DILI, (TATOLI) – Universidade Nasionál Timor Lorosa’e (UNTL), Fakuldade Edukasaun, Arte no Umanidade (FEAU), Departamentu Kímika, aprezenta rezultadu peskiza kona-ba biodiesel, bioetanol, bioplástiku, biogás, hidrolizasaun, fermentasaun, metabolizmu no primáriu hodi promove kímika verde, Timor verde, mundu verde.
Aprezentasaun ne’e hala’o liuhusi simpóziu siénsia kímika iha Departamentu Kímika, subordinadu ho tópiku: Existência a ciência química para construir uma biodiversidade sustentavel no contexto do desenvolvimento de recurso renovavel em Timor-Leste.
Ka, etimolojikamente traduz katak siénsia kímika ne’e hodi konstrui diversidade sustentavel iha kontestu dezenvolvimentu rekursu renovavel iha Timor-Leste.
Simpóziu ne’e sei hala’o durante loron tolu, hahú ohin no termina kuarta semana ne’e; hahú husi dader to’o lorokra’ik.
Xefe Departamentu Kímika, Adirson Rua Castro, iha abertura Simpóziu Siénsia Kímika ne’e hateten dezenvolvimentu industriál ne’ebé akontese antes ne’e hahú husi Eropa to’o mai agora afeta atmosfera, hanesan ásidu nitrojéneu, monosida karbonu-ne’ebé afeta ba kualidade anin.
Tinan-tinan nafatin akontese afeta kualidade moris umana nian no mundu hetók iha périgu nia laran.
“Mundu tomak tenke iha papel forte, estratéjiku ba dezenvolvimentu ho maneira sientífika hodi redús indústria ne’ebé prejudika meiu ambiente no vida umana”, dehan profesór universitáriu ne’e.
Iha fatin hanesan, Dekanu FEAU, Pedro Soares, katak aprezentasaun ne’ebé peskizadór sira hatudu, haktuir ba jerasaun sira tuir mai katak Timór ne’e iha kapasidade.
“Mídia mai, ita hatudu, ita públika ba timoroan seluk hanesan protestu ida ba sira ne’ebé nunka apoiu. Imi la fó apoiu ami halo ida ne’e, rezultadu mak ne’e, imi bele apoiu”, enkoraja dekanu FEAU ba estudante sira hodi nafatin iha korajen, vontade, hodi kontinua atividade akadémika sira.
Iha sorin seluk, Virginia Ximenes, peskizadora ida, haktuir mós nia tópiku peskiza no razaun peskiza.
“Ha’u peskiza kona-ba ai-jambua maibé preferidu liubá ai-fuan jámbua nia kulit; nia hanesan ai-horis ne’ebé iha poténsia boot liu”, informa peskizadora, Virginia Ximenes, ba jornalista TATOLI ho Rádiu Akadémika UNTL iha Kampus FEAU-Liceu UNTL, ohin.
Pezkidora ne’e esplika jambua kulit iha poténsia tanba bele prodús bioetanol. Entaun, liuhusi prosesu mak hahú uluk foti jambua nia kulit. Depois ko’a halo ki’ikoan, habai. Tuir mai, kahur (blender) halo uut no husi uut ne’e foti kilo ida halo eliminasaun ba elementu kímiku ne’ebé mak iha.
Depois ba iha hidrolizasaun, nune’e transforma elementu kímika ne’e ba buat ne’ebé presiza liuhusi prosesu fermentasaun, destilasaun no rezultadu mak sai ba bioetanol.
Estudante finalista Departamentu Kímika UNTL ne’e mós haktuir tan peskiza ne’ebé sira halo ne’e mai husi inisiativa rasik nomós orientasaun husi departamentu, hodi implementa siénsia sira ne’ebé mak durante ne’e aprende ona iha prosesu aprendizajen.
“Atu prepara ba ha’u-nia finalista, entaun liuhusi prosesu ida ne’e habelar, hakle’an siénsia ne’ebé mak iha kona-ba bioetanol”, akresenta.
Entretantu, iha loron dahuluk aprezentasaun no demonstrasaun ba rezultadu investigasaun sientífika ne’ebé halo husi estudante UNTL sira ne’e hetan entuziazmu husi vizitante inklui akadémiku sira.
Biban hanesan iha mós aprezentasaun husi eis-diretór jerál Ministériu Agrikultura no Peska, Gil Rangel da Cruz.
Tuir ajenda ne’ebé mak iha durante simpóziu siénsia kímika ne’e, sei iha mós aprezentasaun husi empreza Heineken, Sekretáriu Estadu Meiu Ambiente nian, TL-Cement, Timor Resources no interveniente konvidadu sira seluk tan.
Jornalista: Rafy Belo
Editora: Rita Almeida
