Amerikanu Nain 27 Hetan Tomada-De-Posse Nu’udar Voluntáriu Korpu-Da-Paz Iha Timor-Leste
DILI (TATOLI)—Ministra Edukasaun, Juventude no Desportu Dulce de Jesus Soares partisipa hamutuk ho Embaixadora Estadus Unidus Amérika Kathleen M. Fitzpatrick iha serimónia tomada-de-posse iha Embaixada Estadus Unidus Amérika iha loron 13 Dezembru 2018.
Grupu ida husi sidadaun Amerikanu na’in 27 halo juramentu servisu nian hodi sai grupu dahaat husi Voluntáriu Korpu-da-Paz ne’ebé serbi ona iha Timor-Leste dezde loke hikas programa ne’e iha tinan 2015.
Primeira vés iha istória programa ne’e nian iha Timor-Leste, grupu ne’e inklui Voluntáriu sira ba Edukasaun ne’ebé sei hanorin dalen Inglés hamutuk ho manorin-na’in Timoroan sira iha eskola sira terseiru siklu no sekundáriu.
Hamutuk ho Voluntáriu sira ba Edukasaun, Korpu-da-Paz Timor-Leste iha mós Voluntáriu sira ba Dezenvolvimentu Ekonómiku hodi ajuda grupu feto sira, grupu labarik feto sira, no lider komunidade sira.
“Amerikanu diversus no talentozu sira ne’e reflete idealizmu aas liu husi Estadus Unidus,” Embaixadora Fitzpatrick hatete molok fó juramentu servisu nian. “Nu’udar Voluntáriu sira Korpu-da-Paz nian, sira kontribui ba hametin amizade entre Estadus Unidus no Timor-Leste.”
Ministra Soares ne’ebé dezempeña papél importante iha dezenvolvimentu Korpu-da-Paz iha Timor-Leste no ho adisaun Voluntáriu sira ba Edukasaun – enkoraja omólogu Timoroan sira hodi serbisu hamutuk no apoia Korpu-da-Paz nia voluntáriu sira atu nune’e sira bele atinje objetivu sira ne’ebé partilla ba malu.
Kavita Pullapilly, Diretora Korpu-da-Paz iha Timor-Leste, fó aplaude ba servisu ne’ebé voluntáriu sira ne’e no sira-nia belun Timoroan sira sei kompleta iha tinan rua tuir mai. “Voluntáriu sira no membru komunidade Timoroan sira, ita-boot sira embarka hamutuk daudaun ba iha jornada furak ida, ida ne’ebé atu haburas amizade, konfiansa, aprendizajen, pesoál, no kreximentu profisionál. Ita-boot sira sei fahe ba malu ita-boot sira-nia esperansa sira ba futuru. Ita-boot sira sei aprende kona-ba no dezenvolve respeitu ba ida-idak nia kulturas. Ita-boot sira ida-idak sei kontribui ba hametin Korpu-da-paz nia legadu.” Pullapily dehan.
Grupu ne’e too iha Dili iha loron 6 Outubru 2018 no hahú kedas formasaun intensivu iha lian Tetun, kultura, no tékniku. Sira sei husik hela Dili semana ne’e hamutuk ho sira-nia omólogu
Timoroan sira hodi ba iha sira-nia komunidade sira iha Liquica, Ermera, Aileu, Ainaro, Baucau, Bobonaro no Manufahi.
Liu Amerikanu nain 170 serbi ona hanesan Voluntáriu Korpu-da-Paz nian iha Timor-Leste dezde tinan 2002. Voluntáriu sira moris ho família lokál sira no serbisu iha komunidade rurál sira durante tinan rua.
CI
