iklan

NASIONÁL, INTERNASIONÁL, EDUKASAUN, JUSTISA, DILI, MUNISÍPIU

Pré-Eskolár Komunitária Abo Lir Gradua Primeiru Estudante

Pré-Eskolár Komunitária Abo Lir Gradua Primeiru Estudante

Primeiru graduadu Pré-Eskolár Komunitária Abo Lir. Foto: Solidariedade Rohan Laek.

DÍLI, (TATOLI)-Pré-Eskolár Komunitáriu Abo Lir, Postu Administrativu Quelicai, Munisípiu Baucau, lokalizadu iha foho matebian huun, ne’ebé harii ho inisiativa husi intelektuál Quelicai oan rasik husi Abo Lir, gradua primeiru estudante hamutuk na’in sia.

Koordenadór jerál Intelektuál “Solidariedade Rohan Laek”, Faustino Soares

Koordenadór Konsellu Pré-Eskolár Abo Lir, Faustino Soares hateten katak Liu husi primeira graduasaun ida ne’e, hahú forma rekursu umanu Timor-Leste nian ne’ebé iha baze koñesementu hanesan hatene lee, hakerek, rona no sura inklui konstrui kreatividade no forma atetude nu’udar infantil ne’ebé poténsia hodi kontinua ba ensinu edukasaun nível tuir mai.

“Ami sente orgullu tanba esforsu voluntáriu hotu ne’ebé halo durante ne’e, konsege hetan konsiderasaun husi governu Timor–Leste, liuhusi Ministériu Edukasaun, Juventude no Desportu tanba ezisténsia pre-eskolár komunitariu Abo Lir ne’e iha ona lisensa operasionál ne’ebé iha lejitimidade hodi produs rekursu umanu ba Timor –Leste nia futuru hahú husi ohin no ba oin,” hateten Koordenadór Faustino Soares, liuhusi komunikadu ba Ajénsia TATOLI, ohin.

 Nia hakutir, liuhusi komunikadu ne’e katak sente hondradu na tebes iha seremónia primeira graduasaun ne’e tanba konsege prezensa máximu husi nai ulun husi nível Munisípiu Baucau no Postu Adminitrativu Quelicai inklui mós autoridade lokál sira. Prezensa Na’i ulun sira ne’e sira sente katak la mesak ona hodi kontinua servisu voluntáriu ba povu Timor-Leste nia di’ak iha tempu futuru.

Bazea ba lema Pre-Eskolár Komunitáriu Abo Lir ne’ebé hatete katak “Sucesso ao futuro, começar de hoje“ sei inspira sira hotu hodi nafatin servisu ba ita-nia rai, liuhusi forma edukasaun iha pre-eskolar no ita hotu sei fiar no laran metin iha dákada rua mai tan konsege fali hamoris kuadru sívil polítiku di’ak Quelicai oan sira ne’ebé uluk mate hotu ba funu libertasaun ida ne’e no ita sei hamoris lider di’ak Timor-Leste nian hahú husi labarik idade infantil ne’ebé koñesimentu integradu no inkluzivu.

“Produtu graduadu husi Pre-Eskolár Komunitáriu Abo Lir, ne’e nu’udar kontinuasaun voluntáriu sidadaun sira nian hodi ajuda prosesu kontrusaun estadu Timor-Leste nian. Tanba ne’e, ami hakarak rekomenda ba ita-nia governu presiza hetan apoiu materiál nesesáriu balun no nafatin hetan apoiu morál ba eskola ida ne’e,” nia rekomenda.

Iha fatin hanesan, Xefe Suku Abo Lir, Fidelio Sarmento dos santos, iha nia intervensaun, tuir komunikadu ne’e katak ezisténsia eskola komunitariu ida ne’e, mai husi komunidade “Solidaridade Rohan Laek“ nia kontribuisaun liliu apoiu materiál konstrusaun, edifísiu temporál no kompleta meja ho kadeira sira.

Inklui, halo kooperasaun ho komunidade Geelong-Australia hodi fó materiál didátiku no fó formasaun ba profesór voluntáriu inklui fó komputadór hodi fasilita serbisu administrasaun pre-eskolár  nian.

Dezenvolve edukasaun husi pré-eskolár to’o nível sekundáriu sira iha nível baze, ne’e nu’udar programa ida durante mandatu, ne’ebé haksumik tanba ita hotu hatene katak edukasaun mak xave ba dezenvolvimentu nasaun nian.

“Nu’udar autoridade lokál nafatin servisu hamutuk ho komunidade no autoridade estadu nível postu to’o nasionál hodi garante sustentablidade ba dezenvolvementu pre-eskolár ida ne’e tanba sai na fatin adekuadu hodi produz rekursu umanu iha baze koñesementu ne’ebé metin hodi kontinua ba oin,” dehan xefe suku ne’e.

Enkuantu, Inspetór Edukasaun Postu Administrativu Quelicai nian, Daniel S.P. Belo mós demonstra katak sente kontente tebes tanba intelektu’al Quelicai oan sira barak mak nafatin iha ispiritu voluntarizmu iha era ukun a’an ida ne’e, hodi konsege hari Pré-Eskolár Komunitáriu Abo Lir ho voluntariamente. Apresia ba emprezáriu Abo Lir oan hanesan ”Domin Matebian” ne’ebé iha fuan-bo’ot hodi ajuda materiál kontrusaun no ekipamentu eskolár nian.

Abo Lir nu’udar fatin istóriku ba luta rezisténsia nian no edukativu iha tempu uluk. Maibé, iha era ukun aan ida ne’e komunidade nafatin iha situasaun marzinalizadu tanba dezenvolvimentu edukasaun no área sira seluk la’o neneik liu kompara nível postu to’o nasionál.

Iha momentu ida ne’e, komunidade Abo Lir rasik hahú halo tan istória foun ida ne’e tanba diresaun edukasaun munisípiu sedauk iha planu atu establese Pré-Eskolár públiku ida iha fatin izoladu ne’e maibé ho espiritu matenek no espritu badinas husi Quelicai oan sira konsege hala’o serimónia primeira graduasaun ba estudante sira.

Vontade ho kapasidade intelektuál Quelicai oan nian ne’ebé harii ona Pré-Eskolár Komunitáriu ho voluntáriu sai ona modelu ba ita hotu hodi dezenvolve ita-nia rai, labele hein de’it politika husi governu ka estadu nian maibé nu’udar sidadaun hahú introduz sentidu ukun rasik aan iha sosiedade nia leet hodi hamenus polítika parasita ba estadu.

“Husu nafatin ba inan-aman sira no autoridade lokál sira kontinua servisu hamutuk ho ita-nia oan intelektuál sira, tulun malu iha aspetu hotu hodi kontribui ba dezenvolvimentu nasaun nian liliu hamutuk luta ba ita-nia moris di’ak iha tempu agora no ba futuru,” akresenta Inspetór Daniel Belo.

Alende ida ne’e, Administradór Postu Administrativu Quelicai, Sebastião Gaio Pires apresia ho nia komunidade iha fatin ne’e tanba konsidera katak iha fuan bo’ot hodi konstrui Pré-Eskolár Komunitáriu Abo Lir ho voluntariamente. “Ha’u fiar timoroan intelektuál barak ona liuliu Quelicai oan barak ona maibé sei presiza tebes ema ne’ebé iha espiritu solidaridade no voluntarizmu hanesan dadaun hatudu ona iha Abo Lir hodi ajuda dezenvolvimentu nasaun nian husi baze to’o nível nasionál,” haktuir komunikadu.

Autoridade ne’e mós konsidera katak kontribuisaun voluntáriu husi Komunidade Abo Lir, Suku Abo ne’ebé harii Pré-Eskolár Komunitáriu ne’e ajuda duni ita-nia prosesu dezenvolvimentu nasionál. Liliu, dezenvolve edukasaun iha Timor-Leste, hahú husi nível infantil hodi kontinua ba nível tuir mai. Tanba ne’e, nu’udar administradór Quelicai sei aprezenta ezisténsia Pré-Eskolár ne’e ba parte komponente estadu ne’ebé relevante hodi hetan apoiu ruma ba nesesidade Eskola Komunitária ne’e.

Pré-Eskolár Komunitáriu Abo Lir nia ezisténsia ne’e pertinente tebes hodi prepara rekursu umanu futuru Abo Lir nian tanba iha foho Matebian huun, iha poténsia boot ba fatin turizmu istóriku nian.

“Atu proteje fatin istóriku hirak ne’e presiza investe maka’as iha setór edukasaun hodi produz rekursu umanu ne’ebé iha koñesimentu di’ak no iha kreatividade apropriadu inklui attitude ne’ebé sai orgullu nu’udar timoroan iha futuru,” katak Administradór Postu Administrativu Quelicai, Sebastião Gaio Pires.

Iha okaziaun hanesan, Reprezentante Diretór Edukasaun Munisípiu Baucau, João Inácio de L. Freitas, iha nia intervensaun, tuir komunikadu ne’e katak reprezenta edukasaun munisípiu hodi rona no rekolla informasaun sira ne’ebé liga ba dezenvolvimentu fíziku no naun-fíziku husi pré-eskolár komunitáriu ne’e atu relata filafali ba diresaun oinsá mak bele fó apoiu materiál no morál ba eskola komunitáriu ne’ebé konstrui voluntariamente husi komunidade rasik.

Nia mós akresenta katak atu garante kualidade ensinu pré-eskolár ne’e presiza akompañamentu di’ak husi profesór sira, inklui inan-aman ba ita-nia oan sira husi loron ba loron to’o tinan.

“Tanba labarik idade infantil ne’e presiza ita-nia pasiénsia ne’ebé bele ajuda sira-nia dezenvolvimentu karakter umanu ho baze koñesimentu ne’ebé metin,” konsidera Reprezentante João Inácio de L. Freitas.

Entretantu, kronolojia, harii Pré-Eskolár Komunitáriu ne’e, tuir koordenadór Faustino Soares, antes ne’e katak iha tinan 2018 intelektuál “Solidariedade Rohan Laek” Abo Lir, Suku Abo, Postu Administrativu Quelicai, Munisípiu Baucau hanesan Lorenço Soares, Terezinha Da C. Belo, António M. Soares, Olandina Soares, João Pinto, Faustino Soares, Carlito Soares, Mariano J. Soares, , Franquelino Tadeu Cabral, João Lino Dos Santos, Duarte E. Soares, Anita Da Conceição, Manuel Ximenes no doutór Simão do Rosário husi Munisípiu Díli, servisu hamutuk ho Autoridade Lokál Suku Abo, Fidelio Sarmento Dos Santos no Pedro Cabral “Maquino” nu’udar veteranu husi Suku Abo konsege harii Pré-Eskolár Komunitáriu ne’e hodi sai fatin mahon ba prosesu aprendizajen infantil iha área rurál, liliu ba povu ki’ik no ki’ak nia oan sira ne’ebé partensia iha Foho Matebian hun.

Pre-eskolár komunitáriu Abo Lir refere, nu’udar edukasaun alternativu ba labarik idade infantil ne’ebé mak hela iha área rurál sempre lakon nia direitu asesu ba edukasaun hanesan mós sira seluk ne’ebé hela iha kapitál.

Tanba governu seidauk iha planu asaun konkreta hodi dezenvolve kursu nível Pré-eskolár iha teritoriu nasionál tomak, maske polítika ne’e previstu ona iha Planu Estratéjiku Dezenvolvimentu Nasionál, inklui asuntu pré-eskolár prevé ona iha lei baze edukasaun.

Relativamente Pré-Eskolár Komunitáriu Abo Lir hanesan edukasaun alternativu infantil foun ida ba komunidade sira ne’ebé mak parténsia Foho Matebian hun. Tanba komunidade hirak ne’e foin mak hatene importansia Pré-eskolár ba oan sira-nia baze koñesimentu ne’ebé forte hodi kontinua estudu iha nivel edukasaun tuir mai.

Pré-Eskolár Komunitáriu Abo Lir hetan ona lisensa operasionál husi Ministeriu Edukasaun hodi fo lezitimidade ba ezisténsia kursu refere.

“Tanba ne’e, inisiu tinan 2018 hahú hala’o ona matrikulasaun ba primeiru estudante ho totál hamutuk 32 pessoas hodi hala’o prosesu aprendizajen tuir kuríkulu mínimu Ministériu Edukasaun nian,” relata koordenadór jerál, Faustino Soares.

Infra-estrutura Pré-Eskolár Komunitáriu Abo Lir mak hanesan edifísiu temporál ho modelu konstrusaun tradisionalmente ne’ebé kompostu husi Sala Aula rua (2), eskritóriu ida (1), sala lojistika Ida (1) no haris fatin ida (1). Inklui, kompleta mós kadeira ho meja ba kada estudante sira no materiál didatikus ne’ebé sufisiente.

Materiál konstrusaun ba edifísiu temporál no ekipamentu hanesan meja ho kadeira ne’e kontribui voluntariamente husi komunidade Abo Lir ne’ebé iha fuan bo’ot ba ema ki’ik no ki’ak sira, liliu mai husi komunidade ne’ebé iha espiritu “Solidariedade rohan laek”. Inklui, hetan ajuda materiál didatikus no komputadór ho unidade rua (2) husi Geelong Kindergarten Association (GKA)-Austrália.

Rekursu umanu Pré-Eskolár Komunitáriu Abo Lir nia, liliu parte estrutura prinsipál sira hamutuk na’in ne’en (6) inklui profesór voluntáriu na’in rua (2) ne’ebé mak hetan ona formasaun husi Geelong Kindergarten Association (GKA)-Austrália, hodi hanorin estudante sira tuir kuríkulu nasionál ne’ebé mak eziste iha Timor-Leste.

Profesór voluntáriu na’in rua (2) nu’udar mós komunidade husi Abo Lir, Suku Abo, Postu Administrativu Quelicai, Munisípiu Baucau ho voluntariamente hanorin oan sira ne’ebé mak idade infantil atu forma baze koñesimentu ne’ebé metin hanesan le’e, hakerek no sura hodi kontinua ba nível edukasaun báziku no sekundáriu.

Atu garante sustentabilidade ba prosesu aprendizajen Pré-eskolár refere, parte estrutura balun voluntariamente halo kontribuisaun pesoál kada fulan tuir kbi’it “Solidariedade rohan laek nian” hodi fo insentivu finanseiru oituan ba Profesór Voluntáriu na’in rua (2) hodi augenta ba moris lorloron.

“Grupu intelektuál ‘Solidariedade Rohan Laek’ Abo Lir ne’ebé mak harii Pré-Eskolár Komunitáriu ne’e, nu’udar parte kontribuisaun ba prosesu luta libertasaun povu Maubere. Tanba ne’e mak fó edukasaun infantil ho gratuitamente ba povu ki’ik no ki’ak nia oan sira ne’ebé mak laiha kbi’it atu mai asesu Pré-eskolár iha kapitál,” haktuir alumni Universidade Nasionál Timor Lorosa’e (UNTL), Faustino Soares.

Jornalista: Rafy Belo

Editór : Manuel Pinto

iklan
iklan

Leave a Reply

iklan
error: Content is protected !!