F-FDTL-PNTL Hahú Asegura Seguransa Ba Natal-Tinan Foun
DILI, (TATOLI) – Komandu FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) dispoin efetivu atu asegura loron Natal no Tinan Foun mai ne’e, hahú ona iha loron 15 dezembru liuba.
“Ba Natal no Tinan Foun, ami dispoin efetivu ida no polísia mós efetivu ida. Ami iha koordenasaun nia laran atu halo oinsá bele asegura Natal no Tinan Foun”, Xefe Estadu Maior FALINTIL-Forsa Defeza Timor-Leste (F-FDTL), Lere Anan Timur, ba jornalista sira iha Palásiu Prezidente Nicolau Lobato, Bairru Pité, Kuarta ne’e, hafoin relata situasaun seguransa ba Xefe Estadu, Francisco Guterres Lú Olo.
Nia hakutir sira haforsa seguransa rai laran hahú kedas iha 15 Dezembru liu-ba, tanba ne’e agora situasaun la’o di’ak hela.
“Maibé ita konta katak joven nakar sira sempre halo problema bainhira hemu lanu. Maibé, ami buka fórma oinsá atu hamenus no evita buat sira ne’e”, Lere afirma.
Nia apela ba joven sira atu hadomi futuru no futuru tenke harii kedas iha prezente tanba se lae futuru laiha ona.
“Kona-ba Artes Marsiais mós ha’u hateten beibeik katak sira ne’ebé tenke taka ba nafatin, maibé bainhira loke fila fali tenke sai hanesan desportu Timor ninian para sira bele kompete. Hanesan foin lalais iha Suai, Artes Marsiais kompete malu liuhusi kompetisaun hanesan SH, Kera Sakti, KORK. Hanoin katak ida ne’e di’ak liu”, informa.
Jornalista: Xisto freitas
Editora: Rita Almeida
