DILI (TATOLI)-Ministra Finansa en ezersísiu, Sara Lobo Brites, preokupa ho saláriu funsionáriu públiku (FP) sira ne’ebé tarde no espera katak ohin loraik bele simu ona.
“Ha’u seidauk konfirma, ida ne’e maka loron hira ne’e ami serbisu hamutuk haree hela tanba ita sei haruka ba banku”, Sara afirma iha Ministériu Finansa (MF) Aitarak-Laran, ohin.
Vise-Ministra ne’e hatete katak saláriu fulan ne’e tarde duni, maibé direitu funsionáriu sira-nia sei selu dentru fulan ida ne’e.
“Ita kompara ho fulan sira uluk ne’ebé maka selu iha 24, 23 agora ita selu iha 28, atrazu tiha ona”, katak.
Entertantu husu sobre Orsamentu Jerál Estadu 2019 nian ne’ebé Prezidente Repúblika veta no Governu kontinua utiliza rejime duodesimál, Vise-Ministra ne’e hatete iha semana ida ne’e maka Parlamentu Nasionál sei halo desizaun, pur tantu depende ba desizaun ne’ebé Parlamentu foti hodi halo reapresiasaun haruka fali ou sei halo alterasaun, ida ne’e maka sei define duodésimu to’o bainhira.
Tanba ne’e bainhira iha kinta (31/1) Parlamentu Nasionál halo ona desizaun maka foin bele hatene duodésimu to’o bainhira. “Tanba agora ita iha ona 28, posivel fevereiru ita iha nafatin duodésimu”.
Jornalista : Maria Auxiliadora
Editór : Manuel Pinto
