Disputa Fronteira Marítima, Delegasaun Vanuatu Hasoru PM Taur Matan Ruak
DILI (TATOLI) –Primeiru Ministru Timor-Leste, Taur Matan Ruak, ohin iha Palásiu governu simu delegasaun husi Repúblika Vanuatu. Vizita delegasaun ne’e mai Timor-Leste (TL), hodi hetan esperiénsia konaba negosiasaun fronteira Marítima.
Vanuatu hanesan nasaun ida ne’ebé mós iha problema kona ba fronteira Marítima, sira iha disputa hela ho Governu Franca, ne’ebé agora daudauk iha provínsia ultramarina ida naran New Caledonia ne’ebé besik Vanuatu.
Ministru Negósiu Estranjeiru no Kooperasaun, Dionísio Babo, dehan, delegasaun ne’e hakarak aprende esperiénsia husi TL.
“Ohin dadeer ha’u mai akompaña Primeiru-Ministru hodi halo enkontru ho delegasaun ida mai husi Repúblika Vanuatu nian, ne’ebé sira hanesan visitor ba Gabinete Fronteira Marítima ho Maun Boot Xanana nian, hodi partilla informasaun no iha tempu hanesan sira hakarak aprende oinsá mak Timor-Leste konsege supera nia soberania, liu-liu rezolve problema tasi nia ou fronteira Marítima entre Timor-Leste ho Austrália,” Dionísio Babo tenik ba jornalista sira ohin, iha Palásiu Governu.
Nia esplika, Vanuatu nasaun ida iha pasífiku ne’ebé dezde uluk tempu rezisténsia sempre apoiu TL ba independénsia liuhosi sira nia Primeiru-Ministru, no agora sira kontinua nafatin polítika ida ne’e.
Tanba durante ne’e sira (Vanuatu) mós iha problema ne’ebé sira hasoru kona ba fronteira Marítima, iha disputa ho Governu Franca, ne’ebé agora daudauk iha provínsia ultramarina ida naran New Caledonia ne’ebé besik Vanuatu, Sira interesadu tebes atu bele aprende husi Timor-Leste, nó mós fahe informasaun balun konaba rezolusaun konflitu iha parte Marítima nian.
“Vanuatu interesadu ho ita, tanba ita uza mekanizmu konsiliasaun obrigatóriu tuir lei tasi internasionál, tanba ne’e mak sira hakarak hatene oinsá mak Timor-Leste konsege hamutuk ho Austrália hodi rezolve disputa, maibé sei sai amigu nafatin hodi bele mantein relasaun di’ak nasaun rua nian,” Ministru Estranjeiru TL ne’e haktuir.
Tuir Dionísio, Primeiru Ministru, Taur Matan Ruak fó esperansa ba delegasaun Vanuatu nian katak, TL preparadu atu apoia nafatin tuir kapasidade no koñesimentu hodi ajuda Vanuatu atu bele rezolve sira nia fronteira Marítima.
Iha parte seluk membru Parlamentu no Xefe Ekipa Vanuatu, Johny Kaonapo hateten sira hasoru Xefe Governu atu reforsa relasaun ne’ebé la’o durante ne’e, liu-liu relasaun entre lider nasaun sira.
“Vizita ne’e mós atu hetan esperiénsia husi Timor-Leste, nune’e Vanuatu bele prepara no hahú negosiasaun, bainhira ita hahú ema bele iha solidariedade no suporta, tanba ne’e ami iha ne’e atu halo diskusaun konaba asuntu ne’e”, nia haktuir.
Entretantu delegasaun husi Vanuatu ne’e kompostu husi Membru Parlamentu no Xefe Ekipa, Johny Kaonapo, Prokuradór Jerál Repúblika Vanuatu, Arnold Kiel Loughman, Konsellu Parlamentár Repúblika Vanuatu, Angeline Dov, Xefe Divizaun Kooperasaun Interna no Komérsiu External, Yvon Basil, Xefe Departamentu Tratados no Konvensõens, Rosiline Lesines Tekon no Xefe Divizaun ba Assuntus Marítimas ba Oceanos, Toney Tevi.
Antes hasoru malu ho Primeiru Ministru, ekipa ne’e hasoru malu ona Xefe Negosiadór Prinsipál ba Fronteira Marítima, Xanana Gusmão no Ministru Estadu Prezidénsia Konsellu Ministru, Agio Pereira hodi rona esperiénsia durante halo negosiasaun Timor-Leste ho Austrália.
Jornalista: Julia Chatarina
Editór : Manuel Pinto
