DÍLI, (TATOLI)-Administrasaun Nasionál Seguransa Nuklear Ministériu Enerjia EUA nian (NNSA/DOE) sei hala’o semináriu kona-ba salvaguarda nuklear iha Díli husi loron 11 to’o 13, 2019.
Semináriu ne’e nia objetivu mak atu sensibiliza responsabilidade governu Timor-Leste nian kona-ba responsabilidade salvaguarda internasionál no valór sira husi rejime internasionál kona-ba naun-proliferasaun nian no esplika oinsa mak Timor-Leste bele apoia hametin sistema iha nia nasaun rasik no rejiaun ne’e.
“Embaixadora EUA ba Timor-Leste, Kathleen M. Fitzpatrick sei hato’o diskursu iha abertura semináriu ne’e, iha Sala Maubara, Timor Plaza Segunda-feira tuku 9 dader, 11 Febreiru 2019,” haktuir komunikadu EUA ba Ajénsia TATOLI, ohin lorokraik ne’e.
Tuir komunikadu ne’e, Ministériu Negosiu Estranjeiru mak lidera delegasaun Timor-Leste nian ne’ebé sei inklui mós membru balun husi ministériu seluk.
Semináriu ne’e sei oferese esplikasaun kona-ba nasaun sira-nia responsabilidade tuir akordu salvaguarda abrajente ho Ajénsia Enerjia Autómika Internasionál (IAEA) no akordu sira seluk.
Semináriu ne’e mós sei ko’alia kona-ba benefísiu ba nasaun membru IAEA nian no utilizasaun pasífiku siénsia no teknolojia nuklear hodi hetan avansu iha meta dezenvolvimentu nasionál.
Jornalista: Rafy Belo
Editór : Manuel Pinto
