KM Aprova Rezolusaun MNEK Haforsa Adezaun TL Ba ASEAN
DILI, (TATOLI) – Atu reforsa adezaun Timor-Leste ba organizasaun nasaun naklibur sira iha rejiaun Sudeste Azíatika (ASEAN-sigla inglés), Governu liuhosi sorumutu Konsellu Ministru (KM), ohin aprova rezolusaun hosi Ministériu Negosiu Estranjeiru no Kooperasaun (MNEK) atu nomea eminente ida hodi reprezenta Nasaun ba promosaun adezaun ba organizsaun ne’e.
“Rezolusaun ne’ebé aprovadu atu fó poder ba ha’u hodi indika figura ka pesoa eminente ne’ebé bele reprezenta Timor-Leste liliu ba iha ámbitu ASEAN”, dehan Ministru Negosiu Estranjeiru no Kooperasaun, Dionísio da Costa Babo Soares, ba jornalista sira iha Palásiu Governu, ohin.
Nia esplika, knaar hosi eminente ne’e maka halo polítika, kampaña no koordenasaun ho nasaun membru sira para aselera prosesu adezaun.
Ho aprovasaun rezolusaun ne’e fó ona poder ba MNEK atu nomea eminente ne’e hodi apoiu servisu ministériu ne’e nian.
“Ninia prezensa ne’e sei ajuda MNEK atu halo kampaña, apoiu mos halo atividade iha nasaun ASEAN atu sira atende ita tama ASEAN”, afirma.
Rezolusaun ne’e, nia dehan estabele koordenasuan servisu entre diretór jerál ASEAN, ministériu hotu-hotu, tanba iha maiu 2019 ekipa avaliasaun hosi ASEAN lokaliza iha sekretáriadu ASEAN iha Jakarta sei mai Timor hodi avalia prontidaun adere ba organizasaun ne’e, liuliu iha aspetu polítika, defeza, seguransa, ekonomia no sosiu kultura.
Governu sei esforsu atu konvense nasaun membru sira atu simu adezaun ba organizasaun ne’e, tanba aplikasaun Estadu ba organizasaun ne’e iha 2011.
“Tinan sia ona to’o agora sira seidauk fó luz verde (lampu matak) maibé ita halo esforsu tinan ne’e se laiha rezultadu di’ak, ita estuda hodi re-definie polítika tama ou la persiza tama ASEAN”, realsa.
Organizasaun ne’e hamrik iha loron 8 agostu 1967 iha Bangkok hosi ninia membru nasaun sira oras ne’e kompostu hosi Filipina, Malazía, Indonézia, Brunei Darusalam, Tailándia, Vietname, Mianmar, Singapura, Laos no Kambodia.
Enkuantu nasaun sira ne’ebé maka iha ona interese adere ba organizsaun ne’e hanesan Timor-Leste, Papua Nova Guíne, Taiwan, Banladéza no Palau.
Jornalista: Agapito dos Santos
Editora: Rita Almeida
