DILI, (TATOLI) – Ministru Ensinu Superiór, Siénsia no Kultura (MESSK), Longuinhos dos Santos, hasoru Ministru Obra Públika, Salvadór Eugénio Pires, hodi atualiza revizaun dezeñu Institutu Politékniku.
“Objetivu hasoru malu ho ministru obras públikas, atu haree programa revizaun dezeñu ba institutu politékniku Lospalos, Manatutu no Betanu, sei tama hela prosesu revizaun ba dezeñu. Atu realiza depende ba dezeñu ne’e, hafoin ita sei tama ba faze planu iha Orsamentu Jerál Estadu 2020”, tenik Longuinhos dos Santos ba jornalista sira iha Kaikoli, ohin.
Nia haktuir Lospalos ho rai ektare 10 atu harii turizmu otelária, iha Manatutu rai ektare 174 harii akadémiku peska no mariñu, enkuantu Betanu ho rai ektare 10 ba Institutu Politékniku Betanu (IPB) Kay Rala Xanana Gusmão.
Kona-ba montante orsamentu, Governante ne’e dehan seidauk bele kalkula tanba iha faze planu dezeña.
Parte seluk, Ministru Obra Públika, Salvadór Eugénio Pires, haktuir enkontru ne’e tulun MESSK halo planu orsamentu ne’ebé di’ak.
“Atu revee nia kustu kada metru kuadradu husi dezeñu ne’ebé mak estabelesse ona, ida ne’e bele fó tulun ba Ministériu Ensinu Superior para tinan 2020 sira bele tau iha planu orsamentu”, katak.
Nia hatutan: “Atu rasionaliza deit, tanba ami sei la halo mudansa ba dezeñu ne’ebé mak estabelessidu ona, fiar katak husi inísiu prosessu hahú estabelesse dezeñu ida ne’e sira identifika ona nesessidade”.
Tuir Salvadór, MOP fó tulun MESSK para bele revee orsamentu ba investimentu instituisaun tolu ne’e.
“Iha ne’e Obras Públikas ajuda atu haree kustu estimativa, fó konsultór bainhira sira submete dezeñu no iha pakote ida sira submete”, tenik tan.
Nia afirma, tuir ministru Longuinhos kustu aas liu, tanba ne’e hakarak hamutuk ho MOP no ekipa Diresaun Jerál obra públika atu revee kustu kada metru kuadradu husi dezeñu ne’ebé estabelese.
Haktuir iha portal ofisiál Governu, programa ne’e tama ona iha programa Governu da-ualu ne’ebé atu reforsa Ensinu Tékniku Superiór, liu-husi espansaun iha área estratéjika ba ekonomia nasionál, liu-liu Institutu Superiór Politékniku ba otelária no turizmu iha Lospalos no akademia peska no estudu mariñu iha Manatutu, no hadi’a kondisaun infraestrutura, jestaun no ba ensinu iha Institutu Politékniku Betanu.
Enkuantu IPB Kay Rala Xanana Gusmão iha Betanu, postu administrativu Same, munisípiu Manufahi, inagura ona ona iha loron 14 novembru 2015 husi Primeiru-Ministru Governu Konstitusionál VI, Rui Maria de Araújo.
Jornalista: Julia Chatarina
Editora: Rita Almeida
