DILI, (TATOLI) – Diretór Nasionál Servisu Prizionál no Reinsersaun Sosiál, Ministériu Justisa, Helder Cosme Marcal Belo, hatete komportamentu dadur no relatóriu sosiál sai sasukat ba governu atu fó perdaun (indultu) ba dadur sira depois kumpre ona metade hosi totál pena ne’ebé tribunál deside.
Tuir planu iha maiu 2019, Prezidente Repúblika, Francsico Guteres Lú Olo, sei fó indultu ba dadur sira ne’ebé durante ne’e kumpre ona pena iha komarka Bekora, Glenu no Suai.
Indultu no komutasaun pena ne’e hakerek ona iha lei númeru 5/2016. Proponente ba indultu ne’e maihosi advogadu, defensór públiku, família kondenadu, kondenadu rasik, diretór estabelesementu prizaun hanesan Bekora, Glenu no Suai bazea ba relatóriu sosiál no komportamentu pesoál dadur sira nian.
“Ami nia papel maka elabora relatóriu sosiál no segundu maka ninia komportamentu iha prizaun laran no proponente sira hosi ida ne’e maka ita aneksu hodi hato’o ba ministru justisa no ministru kontinua lori ba tribunál sira ne’ebé foti desizaun depois tribunál halo parseira mai ita hato’o ba ministru lori ba prezidente bele hola konsiderasaun”, katak nia ba TATOLI, ohin iha ninia kna’ar fatin KaiKoli.
Relatóriu sosiál ne’e haree hosi saúde, kondisaun ekonomia família kondenadu depois kumpre pena, nune’e komportamentu kumpre dever sira iha prizaun hanesan halo tuir orden hosi guarda prizaun, kumpre oráriu prizaun, implementa atividade iha prizaun no kooperasaun di’ak entre dadur no guarda prizaun.
Diresaun nasionál prizaun simu ona proposta tolu hodi haruka ona ba Prezidente Repúblika no haruka ona despaisu ba diresaun ne’e atu prosesa ona indultu ba kondenadu nain tolu ne’e.
Diresaun ne’e sei kontinua simu proposta hosi kondenadu, defensór, advogadu no sira seluk tan ne’ebé husu fó indultu ba sira nia kliente. “Ita hein hela proponente sira nian proposta hodi propoin ema sira ne’e mai”, dehan tan.
Hatan kona-ba eis membru governu sira ne’ebé oras ne’e kumpre pena hetan indultu, diretór ne’e hatete depende hosi prononente sira nia proposta atu propoin ba ministériu justisa hodi prosesa, maibé to’o oras ne’e seidauk iha.
Dadur sira ne’ebé atu hetan indultu maizumenus tenke kumpre pena um-tersu hosi totál pena kondenadu.
Iha tinan kotuk governu haruka lista dadur pur-volta 64 maibé hosi númeru ne’e dadur nain ida maka hetan kumutasaun pena no hetan ona liberdade kondisionál tuir dekretu lei númeru 14/2014 kona-ba rejime ezekusaun penál.
Entretantu, dekretu prezidensiál deside ona loron 20 maiu no 28 novembru kada tinan sei fó indultu no komutasaun pena ba dadur sira.
Jornalista: Agapito dos Santos
Editora: Rita Almeida
