iklan

DILI, MUNISÍPIU

Tanba Lixu, Governu Simu Krítika

Tanba Lixu, Governu Simu Krítika

Vise Ministru Administrasaun Estatál, Abílio José Caetano. Imajen/Mídia Komunikasaun UNTL.

DILI, (TATOLI) – Governu liuhosi Ministru Administrasaun Estatál en funsaun, Abílio José Caetano, admite katak Ministériu Administrasaun Estatál (MAE) no Munisípiu Dili simu krítika tanba lixu ne’ebé rekolla lahotu.

“Pur tantu Governu, Munisípiu Dili rekoñese postu sira ne’ebé ita so’e lixu iha sidade Dili ne’e iha 200 de’it”, ministru dehan iha ámbitu feira investigasaun ekonsiénsia iha kampu sentrál Universidade Nasionál Timor Lorosa’e ho tópiku “Ambiente no Enjeñaria” ne’ebé nia parte ko’alia sobre jestaun melloramentu rekolla rezíduo sólidu iha sidade Dili no polítika ne’ebé Governu Konstitusionál Daualuk hakarak hala’o, maibé iha kontinuasaun ho polítika ezekutivu anteriór nia, ohin.

Nia hatutan: “Iha pontu balun iha umakain atus-ida ou atus-rua maka bá so’e, tanba ne’e maka dalaruma lixu ne’e naklekar to’o estrada tanba foti mós labiban”.

Iha tempu Indonézia no independénsia to’o agora lixu sai problema ba ema hotu ne’ebé moris iha Dili nomós ba Governu. Hahú husi momentu ne’ebá até ohin loron rekolla fo’er sólidu ho manuál.

Tanba ne’e iha 2016 Sestu Governu hasai rezolusaun númeru 32/2016 aprova estratéjia ba melloramentu jestaun rezíduo sólidu urbana iha sidade Dili no ida ne’e oinsá mellora rekolla lixu iha kapitál.

Iha marsu 2017, ba kontinuasaun rezolusaun polítika Governu Daneen hasai tan dekretu lei númeru 2/2017 ne’ebé aprova jestaun rezíduo sólidu urbanu iha Dili.

Rezolusaun no dekretu lei ne’e maka sai hanesan polítika atu halo melloramentu rekola rezíduo sólidu iha Dili laran.

Bainhira ko’alia ambiente hakarak iha kondisaun ida di’ak ba ema hotu maka lixu ne’e sai kestaun ida ba Governu liuliu ba Munisípiu Dili.

Tanba ne’e iha Governu Daualuk kontinua polítika ne’e no ida ne’e maka atu implementa to’o 2023. Pur tantu durante tinan haat to’o lima iha 2022, espera rekolla rezíduo sólidu ne’ebé halo ho manuál durante ne’e sai mekanizadu.

“Katak ita sei privatiza rekolla rezíduo sólidu ba setór privadu nune’e ita espera rekolla lixu ne’e la’ós ita ra’ut de’it ona, maibé mekanizadu. Polítika Governu, ita sei tau kontentór ne’ebé adekuadu iha sidade Dili laran depois bainhira foti lixu ne’e la’ós ita atu foti ho liman katak karreta própria ida maka sei mai foti kontentór ida ne’e hodi lori bá lixeiru Tibar”.

Tanba ne’e preparasaun mak durante 2019, iha ekipa ADB (Banku Dezenvolvimentu Aziátiku) ida maka agora ajuda Munisípiu Dili hodi fó asisténsia ba sira ho Governu oinsá atu implementa polítika ida ne’e.

Pur tantu, polítika dahuluk iha tinan ne’e maka privatiza, maibé mekanizadu no desizaun ne’ebé foti Governu maka sei investe para halo kontratu ho kompañia depois halo nia jestaun.

Nia lala’ok maka iha tinan ne’e Governu sei sosa karreta própria ne’ebé aban-bainrua sei foti lixu, depois iha 2020 sei hola kontentór pur volta 1200 ne’ebé iha tipu tolu mak ida tonelada ida, ida ho balu no haat no iha 2021 sei halo aprovizionamentu ba kompañia tolu no hein katak iha 2022 bele implementa ona.

“Nia sustentabilidade ba ita oinsá? Ita-sira ne’ebé moris iha Dili, ita maka sei selu taxa ba lixu ne’e, apezár ita privatiza maibé sustentavel katak Governu lapresiza investe ona”.

Tuir estudu ne’ebé ADB halo, taxa husi lixu ne’e nia sustentabilidade mak ema hotu sei selu taxa ba lixu.

Taxa ne’e maka bainhira sosa pulsa eletrisidade nian no tuir estudu katak ba ema utilizadór eletrisidade iha Dili bainhira sosa kada kilowatt Estadu sei ko’a 0.01 sentavu signifika bainhira sosa pulsa dólar 10 maka sei ko’a 0.83 séntimu ba taxa lixu nian.

Ba setór emprezariál sei selu sentavu 0.02 kada kilowat,  ezemplu, kuandu sosa pulsa dólar 6000 signifika tenke seluk taxa lixu ne’e dólar $500.

Umakain iha Dili laran inklui kompañia ne’ebé iha pulsa eletrisidade ketak tuir sensu 2015 pur volta rihun 45, signifika iha tinan ida husi taxa eletrisidade ne’ebé sosa bele kobre milliaun $2.3.

Signifika iha profit ka lukru katak iha diferensa dólar 500 husi milliaun $1.8 ne’ebé kada tinan Governu aloka ba Munisípiu Dili ra’ut fo’er.

Nia hatutan sobre dadus estrada ne’ebé foti iha Dili laran tomak ne’e pur volta kilómetru 175. Bainhira implementa polítika mekanizadu husi kilómetru 175 ne’e sei tau iha 1200 pontu (kontentór) signifika iha kada métru 100 sei tau kontentór ida no ida ne’e maka estudu ne’ebé halo ona tanba daudaun ne’e iha sidade Dili postu lixu iha de’it 200.

Iha 2021 bainhira halo faze ida ikus ne’ebé maka halo kontratu ho empreza tolu no kompañia ida sei halo jestaun limpeza husi Dili orientál no ida halo iha Dili osidentál, no ida maka sei halo jestaun ba lixeira Tibar.

“Pur tantu iha rezolusan no dekretu lei ne’e iha ne’ebá katak iha lixeira Tibar ne’e sei halo aterru kontroladu, maibé depois ami halo diskusaun daudaun ne’e parese hakarak muda husi aterru kontroladu ba iha jestaun lixeira”.

Tanba jestaun lixeira ne’e iha kompañia barak maka interese katak lixu hotu-hotu sira bele halo resiklajen, no tuir empreza sira ne’e pur volta porsentu 90 husi fo’er ne’ebé sai husi sidade bele uza filafali no porsentu 10 de’it maka bele sunu, maibé ho teknolojia ida ne’ebé bele lakon iha segundu nia laran no laiha su’ar.

Jornalista: Maria Auxiliadora

Editora: Rita Almeida

iklan
iklan

Leave a Reply

iklan
error: Content is protected !!