DNTT Planea Estabelese Halte

DILI, (TATOLI) – Xefe Departamentu Tráfiku Terminál Diresaun Nasionál Transporte Terrestre (DNTT), João Eugenio Cabral da Silva, informa DNTT iha ona planu atu kria halte (fatin para karreta atu hatún no hasa’e pasajeiru), nune’e transporte públiku liuliu mikrolet no biskota tenke para iha fatin ne’e no labele para arbiru.
“Para ita eduka ita-nia ema bá sa’e ona karreta iha halte. Ne’e maka iha tinan ida ne’e nia laran serbisu hamutuk para iha orsamentu tau ba halte no serbisu hamutuk ho Polísia Tránzitu para mikrolete sira ne’e para fatin halte ne’ebé maka iha atu labele akontese asidente no engarrafamentu”, João Eugenio dehan iha Balide, ohin.
Tanba ne’e maka iha tinan kotuk DNTT koopera ho Diresaun Urbana hodi halo planu ba ida ne’e no agora haree orsamentu ne’e iha para bele halo halte ne’e.
“Tinan ida ne’e ami-nia orsamentu iha duni, ami bele realiza kona-ba halte ne’e”, katak.
Atubele estabelese fatin ida ne’e maka DNTT sei hahú uluk ho pilotu no sei latau iha fatin hotu, maibé tau uluk iha fatin ne’ebé rame depois bá oin haree buat ne’e di’ak ona ba ita maka sei tau hotu iha fatin-fatin mikrolete husi 01-012 halo operasaun ne’e.
Fatin sira ne’ebé identifika rame liu maka bá Komoru no Bidau nia tanba bá Bidaun ne’e iha mikrolete hira kedan maka halai bá ne’ebá liuliu iha Mandarin kuaze bemo neen maka liu ne’ebá, depois iha Akadiru-hun iha mikrolete haat halai ba parte ne’ebá no parte Bekora iha rua, nune’e haree hela fatin sira ne’e.
“Fatin ami identifika hotu ona, agora, tinan ne’e iha orsamentu ami implementa ona”.
João Eugenio afirma ida ne’e nesesáriu tebes, tanba dalabarak mikrolete ne’e para arbiru no lafó distánsia ba ema seluk no kadavés para tama estrada klaran.
“Obra Públika loke estrada luan dalaruma ita-nia mikrolete sira ne’e para dobru liuliu iha Akadiru-hun sa’e mai ospitál Toko Baru ne’e. Iha ne’ebá ami tau tiha ona sinál labele para, mas kontrolu seidauk másimu husi Polísia ne’ebé sempre sira para dobru”, haktuir.
Tanba ne’e DNTT hanoin katak tenke halo halte para labele akontese tan ida ne’e.
Jornalista: Maria Auxiliadora
Editora: Rita Almeida

