EUA Ho SEA Reforsa Kooperasaun Iha Área Ambiente

DILI, (TATOLI) – Sekretáriu Estadu Ambiente (SEA), Demétrio do Amaral de Carvalho, ho embaixadora Estadu Unidu Amérika (EUA) ba Timor-Leste, Kathleen M. Fitzpatrick, hasoru malu hodi reforsa koopersaun iha área ambiente.
Enkontru ida ohin ho ekipa embaixadora nian ne’ebé iha relasaun ho ambiente ne’e mak USAID (Ajénsia Estadu Unidu ba Dezenvolvimentu) ne’ebé serbisu tinan barak iha Timor-Leste kontribui ba dezenvolvimentu iha país ne’ebé ohin loron iha projetu ortikultura no avansa.
Aleinde ne’e iha projetu kona-ba turizmu ba ema hotu nomós embaixada EUA daudaun ne’e suporta atividade hanesan tasi moos, protesaun ba área protejida no biodiversidade.
“Entaun mai haree atu engaja (atu inklui) serbisu ho ambiente hanesan ita hotu hatene iha programa Governu Daualuk ne’ebé kontribui ba tasi moos, zero plástiku, entaun ami haree atu reforsa liután kolaborasaun entre parte rua”, Demétrio afirma iha Bebora ohin (28/2) hafoin reuniaun.
Eis deputadu ne’e dehan Estadu Unidu liuhusi embaixada iha Timor-Leste haree katak parseiru importante ida maka SEA no liuhusi soru-mutu ohin koko atu identifika fali área saida maka sei bele reforsa liután.
Hanoin katak kooperasaun entre parte rua bele reforsa partisipasaun feto, juventude nomós koordenasaun di’ak liu hodi implementa projetu sira ne’ebé halo mak polítika zero plástiku, tasi moos, nune’e bele kontribui ba dezenvolvimentu ekonomia ne’ebé sustentavel.
Antes ne’e SEA halo ona kooperasaun ho embaixada EAU ho USAID iha tinan kotuk liuhusi partisipasaun Governu Timor-Leste nian iha Our Ocean Talk iha Bali ne’ebé ko’alia kona-ba polítika Oitavu Governu nia sobre zero plástiku iha relasaun ho tasi moos.
Embaixadora Estadu Unidu Amérika (EUA), Kathleen M. Fitzpatrick, relata sorumutu ne’e sobre interese komún kona-ba meiu ambiente liuliu programa zero plástiku.
“Husi Estadu Unidu ami-nia serbisu kona-ba protesaun tasi, biodiversidade Timor-Leste, ami ko’alia kona-ba ami-nia filme tasi ne’ebé sustenta ita, filme husi USAID kona-ba impaktu poluisaun plástiku iha tasi. Ami iha parseiru forte ho Sekretáriu Ambiente”, katak.
Jornalista: Maria Auxiliadora
Editora: Rita Almeida

