DIKI, (TATOLI) – Institutu Siénsia no Relijioza (ICR-sigla portugés) São Tomas Aquino, Lahane gradua tan finalista na’in 103 ba kursu lisensiatura no baxarelatu ba formasaun profesór morál no relijiaun no servisu sosiál tornu da-hitu, hodi apoiu dezenvolvimentu Timor-Leste iha aspetu edukasaun ba estabelesimentu ensinu sira iha teritóriu.
“Sira estuda tinan haat nia laran, agora tempu to’o ona aplika saida mak sira kumprende, saida mak sira hatene atu nune’e bele tulun timoroan seluk atu bele hetan mós formasaun di’ak no bele sai masin no naroman ba ita-nia rain no ba ema seluk”, hateten Reitór ICR, Urbanos Usen Bunga Lolon, SVD, perante jornalista sira hafoin graduasaun, iha salaun São José, Katedrál Bebora, sesta (1/3).
Reitór espera graduadu sira ne’e bele hetan oportunidade hodi kontribui, tuir idaidak nia área, liliu iha área edukasaun nian.
“Sira hotu prepara án atu bele serbisu tanba ha’u-nia hanoin, liliu ba formasaun profesór sira, agora eskola iha Timór laran barak. Eskola presiza profesór no profesora sira”, dehan Reitór Urbanos Bunga Lolon.
Iha fatin hanesan, Domingos da Costa, reprezentante graduadu sira, iha nia diskursu agradese ba ICR, inan-aman nomós família sira-nia kontribuisaun tan apoiu sira bele hakotu sira-nia estudu iha jornada akadémika nian.
“Hahí no agradese ba papa no mama, maske balun ba ona mundu seluk. Imi-nia domin no sakrifísiu sei la lakon iha ami neon, ami sukat la to’o, sura la nahas hanesan lalehan ne’ebé aas, tasi ne’ebé kle’an. Maibé, ami bele dehan imi-nia sakrifísiu mak ami-nia ksolok”, agredese reprezentante graduadu sira.
Enkuantu, reprezentante Ministériu Ensinu Superiór, Siénsia no Kultura (MESSK), Luís Aparício Guterres, ba graduadu sira katak Planu Estratéjiku Dezenvolvimentu Nasionál (PEDN), 2011-2030, rekuñese rekursu umanu ne’e fundamentál atu konkretiza meta dezenvolvimentu sustentável ita-nia nasaun.
Ho sentidu ida ne’e, Oitavu Governu Konstitusionál konsidera setór edukasaun inklui ensinu superiór nu’udar prioridade ida no interese nasionál.
Iha governu ida ne’e, separa Ministériu Edukasaun Juventude no Desportu (MEJD) ho MESSK, atu mellora efikasia sistema ensinu no garante kualidade formasaun iha instituisaun superiór públiku no privada tomak.
Katak, objetivu prinsipál husi governu ida ne’e mak dezenvolve polítika asaun ne’ebé kontribui hodi hadi’a kualidade formasaun lesionada iha instituisaun tomak ensinu superiór nian.
“Ita tenke garante formasaun ida kualidade hodi prepara graduadu sira kualifikadu no kompetetivu ho kompeténsia profisionál, adekuadu ho nesesidade merkadu traballu nian”, afirma.
“Alende kompetente, profisionál, ita tenke gradua joven sira ho kompeténsia umana, ho espiritu solidariedade no entre ajuda ho forma ida ita-nia sosiedade sai ezemplu no kontribui ho efetivu ba dezenvolvimentu ekonómiku sustentável, ho sidadun ida responsável, onestu no karakterizadu ho umanizmu”, reforsa eis-profesór ne’e.
“Ho sentidu ida ne’e, ICR dezempeña papel fundamentál formasaun profesór morál no relijiaun katólika nian no iha área serbisu sosiál. Área sira ne’e iha papel importante ba edukasaun ita-nia joven sira nian no ba país”, nia hatutan.
MESSK mós hato’o felisitasaun ba graduadu ICR na’in 103 inklui família sira tomak.
“Hahú ohin bele partisipa iha dezenvolvimentu país nian ho sentidu responsabilidade, serbisu no esforsu nomós ho entuziasmu, motivasaun no alegria. Esforsa án ba, hasoru responsabilidade hodi buka oportunidade serbisu ho korajen no optimizmu. Maibé, tenke iha konsiénsia katak la iha buat ida iha moris mak fásil atu alkansa”.
“Ha’u fiar katak valór sira ne’e transmite ona husi ita-boot (graduadu sira-red) sira-nia formadór sira durante périodu formasaun. Ha’u hakarak mós transmite parabéns ba família graduadu, ne’ebé apezarde difikuldade, maibé apoiu oan sira hodi dezenolve sira-nia koñesimentu akadémiku. Parabéns, Parabéns no Parabéns!” kongratula Reprezentante MESSK, Luís Aparício Guterres, alende ba graduadu no família sira maibé mós ba ICR.
Entretantu, oradór sientífiku ka oratio sapienta ba graduasaun ICR turno da-hitu nian ne’e mak Akadémiku Manuel Florêncio Vong ho tópiku Papel Profesór no Katekista Iha Era Mileniál.
Partisipa iha graduasaun ne’e mak família, reprezenta Dioseze Dili, Reitór IOB (Institute of Bussiness), Agusto da Conceição, inkui autoridade eskolár relevante sira.
Jornalista: Rafy Belo
Editora: Rita Almeida
