iklan

EDUKASAUN, DILI, MUNISÍPIU

TVE Lansa Live Streaming

TVE Lansa Live Streaming

Logo TVE

DILI, (TATOLI) – Diretór Ezekutivu Televizaun Edukasaun (TVE), Armindo Crisna Caetano, hatete tinan ne’e ninia parte aumenta programa live streaming (transmisaun vivo) maske hasoru dezafiu iha rekursu umanu, infraestrutura no finansiamentu.

Lansamentu ne’e, governu liuhosi Sekretáriu Estadu Komunikasaun Sosiál (SEKOMS), Merício Juvenal dos Reis Akara, enkoraja atu dezenvolve iha teknolojia dijitál.

“Live Streaming TVE sei lori Timor ba mundu, la’ós de’it divulga notísia no programa sira hodi promove Timor iha kontestu turístiku sira timor nia kultura, rekursu umanu no hothotu para mundu bele koñese di’ak liután Timor nu’udar illa ki’ik oan ida sai nasaun independente”, dehan reprezentante governu bainhira lansa programa ne’e inklui programa foun ho naran revolusaun edukasaun ba hanorin ukun rasik aan iha edifísiu TVE Rai-kotu, ohin.

Nia husu ba dirijente TVE atu kontinua mantein komunikasaun ho Governu hodi bele hetan apoiu durante mandatu governasaun da-ualu.

Iha ámbitu ne’e, Diretór kompañia Tinolina, Agustino Gomes, hatete durante ne’e fó ona apoiu ba instituisaun ne’e atu dezenvolve aan, liuliu aumenta ekipamentu hanesan kamera no mós instalasaun rede kobertura ba territóriu Timor.

“Ha’u apela ba ha’u nia maluk emprezáriu sira, ita hotu-hotu iha devér hodi kontribui uitoan liuhosi atividade sosiál sira hanesan televizaun”, sujere.

Momentu hanesan, Padre Martinho Gusmão, hanesan na’in ba programa revolusaun edukasaun  ba  hanorin ukun rasik aan, haktuir hanoin ne’e mosu tanba hetan inspirasaun hosi saudozu Padre Martinho da Costa Lopes no mós Romo Yusuf Bilyarta Mangunwijaya hosi Indonézia.

Padre Martinho Lopes hanesan timoroan dahuluk ne’ebé tuur iha kadeira parlamentu Portugal iha 1958 nu’udar deputadu hodi defende edukasaun.

Nune’e mós Amu Yusuf Bilyarta Mangunwijaya (matebian) hosi Indonézia defende mós edukasaun ba ema kbiit laek sira.

“Ha’u hakarak halo programa ida ne’e tanba edukasaun ne’e tenke sai …., (ema hotu nian), família, governu, igreja Katólika, ita hotu nian”, afirma.

Entretantu, programa revolusaun edukasaun ba hanorin ukun rasik aan sei fó sai iha fulan-maiu kada kinta kalan.

Programa live streaming ne’e hetan suporta hosi kompañia telekomunikasaun Indonézia nian, Telkomcel.

Jornalista: Agapito dos Santos

Editora: Rita Almeida

iklan
iklan

Leave a Reply

iklan
error: Content is protected !!