DILI, (TATOLI) – Banku Sentrál Timor-Leste (BSTL) tinan ne’e servisu hamutuk ho banku komersiál haat hanesan Banku Nasionál Ultramarinu (BNU) Timór, Banku Nasionál Komérsiu Timor-Leste (BNCTL, sigla portugés), Banku Mandiri no Bank Rakyat Indonesia (BRI) halo sensibilizasaun ba programa poupansa ba “Ha’u-Nia Futuru” atu fasilita inan-aman sira ne’ebé hakarak loke konta ba produtu ne’e.
“Objetivu husi produtu ne’e prepara oan sira-nia futuru, komesa rai ona osan agora ho osan ne’ebé ki’ik, maibé ita bele iha hanoin ona oan nia futuru sai di’ak”, hatete Responsavel ba programa poupansa nian husi Banku Sentrál Timor-Leste (BSTL), Ana Paula Amaral, iha BNU, ohin bainhira lori estudante sira husi Eskola Bázika Sentrál Faról vizita banku refere iha ámbitu realiza atividade Global Money Week no Roads Show ba programa Edukasaun Finanseira.
Produtu ne’e banku hotu oferese, loke konta ho de’it dolar ida ho nia funan porsentu 1.5 kada tinan no kritéria loke konta labarik nian ne’e tenke iha sertidaun RDTL, fotografia labarik ho inan-aman, kartaun eleitorál inan-aman nian.
Tinan ne’e BSTL selebra global money week ne’ebé maka servisu hamutuk ho banku komersiál ho estudante husi Eskola Bázika Sentrál Faról, Kasait-Likisá, Ensinu Báziku Filiál 1,2 Mauboke-Likisá, Eskola Defisiénsia Taibesi no mós Eskola Bázika 1,2 Auxiliadora Komoro, tanba Banku Sentrál foin partisipa ba dahuluk nian iha global money week ne’e.
Ana Paula dehan kona-ba poupansa ida ne’e, labarik sira iha hanoin atu rai osan iha konta ida ne’e.
“Entaun ho ida ne’e oinsá Banku Sentrál komesa habelar informasaun ba estudante sira hotu liuhusi sensibilizasaun, agora, ami hala’o iha eskola sira iha Dili no Likisá, maibé husi ne’e Banku Sentrál iha hanoin ona oinsá atu habelar informasaun iha eskola sira iha munisípiu hotu tanba iha programa ida kona-ba edukasaun finanseira”.
Responsavel ne’e afirma edukasaun finanseira ne’e BSTL fahe informasaun liuhusi profesór sira tuir formasaun depois sira implementa programa ne’e iha eskola.
Profesora husi Eskola Bázika Sentrál, Alcina do Rosário, hatete hafoin hetan formasaun iha 2016 kona-ba literasia finanseira ne’e husi banku, nia hatutan ba estudante no inan-aman sira ne’ebé balu konsege lori oan sira loke sira-nia konta ida ne’e. Kuaze estudante barak maka loke ona konta iha banku sira ne’ebé maka iha.
“Sira iha interese no bainhira sira rona hakarak hato’o ba nia kolega sira no balu ami la tau sira-nia naran, maibé sira kontente no hakarak tebes atu tuir programa ne’e”, nia dehan bainhira akompaña estudante sira iha programa vizita BNU relasiona ho atividade ne’ebé BSTL hala’o ne’e.
Kona-ba atividade global money week no roads show ba programa edukasaun finanseira iha eskola-sira ne’ebé BSTL identifika ne’e hahú husi 25 to’o 29 marsu 2019 ho objetivu hasa’e koñesimentu alunu sira, profesór sira no inan-aman kona-bá benefísiu no importánsia husi edukasaun finanseira no rai osan ba futuru labarik sira-nian.
Jornalista: Maria Auxiliadora
Editora: Rita Almeida
