Timoroan Rihun Lima Resin Tuir Teste Lian-Korea
DILI, (TATOLI) – Timoroan oan hamutuk rihun lima resin ohin tuir teste hodi partisipa formasaun lian-Korea durante fulan neen to’o tinan ida antes servisu iha Korea Súl iha 2019.
Sekretáriu Estadu Formasaun Profisionál no Empregu Interinu atuál Sekretáriu Estadu ba Kooperativa, Arsenio Pereira da Silva, maka lansa teste ne’e iha salaun Jináziu Dili.
“Teste ne’e hanesan rekizitu ida atu tuir formasaun antes servisu iha ema nia rain”, governante ne’e ba jornalista sira hafoin lansamentu.
Iha biban hanesan, Diretór Jerál SEFOPE, Paulo Alves, hatete ezame ne’e nu’udar faze hodi halo selesaun ba kandidatu rihun lima resin hodi partisipa formasaun lian-Korea.
“Ezame ne’e hotu ita sei públika rezultadu, SEFOPE fasilita de’it maibé preparasaun matéria mai hosi profesór lian-Korea, tanba ne’e sistema ne’e transparente”, hatete Paulo Alves.
Ekipa formadór prepara matéria ezame lian-Korea ho totál númeru 25 no matemátika 30 ho ninia valór diferente.
“Lian-Korea valór boot bainhira responde loos kompara matemátika, Lian-Korea ne’e eskolla de’it liuhosi A, B, C, matéria lian-Korea hamutuk númeru 25 no matemátika pur-volta 30”, tenik.
Nia realsa profesór Korea sira maka sei halo korresaun ba matéria ne’e hodi garante transparénsia no evita nepotizmu iha prosesu ne’e.
Rezultadu formasaun ne’e, posibilidade sei públika iha meadu-abril hodi hahú formasaun iha fulan hanesan.
Hosi totál kandidatu ne’e sei hili de’it ema 2500 hodi tuir formasaun, tanba kondisaun edifisiu no rekursu umanu la permite simu kandidatu barak liután.
Entretantu, teste ne’e hahú ohin no sei termina aban.
Jornalista: Agapito dos Santos
Editora: Rita Almeida
