DILI, (TATOLI)-Populasaun 90% (1.160.175) bele ko’alia Tetun, no iha de’it 5% (58.008) mak bele hakerek padraun ortográfiku Dalen-Tetun ekiparada.
“Totál númeru Universidade Nasionál Timor Lorosa’e (UNTL) nian ne’ebé kompostu hosi estudante ativu, pasivu no alumni maizumenus iha ema na’in 45.000. Signifika katak, hosi populasaun Timór-Leste 5% ne’ebé bele hakerek Dalen-Tétun, iha 3,9% mai hosi komunidade UNTL nian”, divulga mídia Universidade Nasionál Timor Lorosa’e (UNTL) ne’ebé Tatoli asesu, ohin.
Estadu Timór-Leste liuhosi Dekretu Governu nú.1/2004, loron 14 fulan Abríl, hodi estabelese no ofisializa “Padraun Ortográfiku Dalen-Tetun”. Institutu Nasionál Linguístika [INL] ne’ebé tama iha mahan Universidade Nasionál Timór Lorosa’e [UNTL] nian mak nu’udar jestór no responsavel prinsipál ba dezenvolvimentu Dalen-Tetun.
Simultáneamente Tetun hanesan dalen ofisiál no nasionál, ne’ebé utiliza ho forma konsistente ba servisu sira iha administrasaun públika no privada no mós iha komunikasaun sosiál. Tetun esensiál ba konstrusaun nasaun no afirmasaun identidade timorense nian. Tanba ne’e, ninia utilizasaun konstitui imperativu konstitusionál hodi husu parte hotu atu bele konkretiza.
Papél Tetun importante tebes iha prosesu ensinu no aprendizajen. Iha UNTL, eziste departamentu Dalen-Tetun, nune’e mós iha dixiplina transversal Dalen-Tetun I & II, ba kursu hothotu, espesífikamente ba aula semestre dahuluk no daruak. UNTL iha espetativa katak, ninia estudante no alumni sira iha kapasidade atu hakerek, leeno ko’aliaDalen-Tetun tuir padraun ortográfiku.
Iha Timór-Leste, maioria 90% ema bele ko’alia Tetun, infelizmente sira ne’ebé bele hakerek Tetun maizumenus iha de’it 5%. Hosi persentajen haktemik, maioria hosi alumni no estudante UNTL nian.
“Nu’udar korajen, UNTL husu nafatin ba ninia alumni & estudante sira atu hakerek, lee no ko’alia Dalen-Tetun ho profisionál, nune’e bele demonstra diferensa ho graduadu sira hosi Universidade no Institutu Superiór sira seluk”.
Konstituisaun Repúblika Demokrátika Timor-Leste (RDTL) artigu 13o(Lian ofisiál no nasionál). Katak, 1) Repúblika Demokrátika Timór-Leste nia lian ofisiál maka Tetun no Portugés. 2) Estadu valoriza no dezenvolve Tetun no lian nasionál sira seluk. Enkuantu, lian serbisu nian iha artigu 159o, ne’ebé deskreve katak Lian Indonéziu no Inglés nu’udar lian serbisu nian, ne’ebé uza iha administrasaun públiku hamutuk ho lian ofisiál sira, bainhira presiza.
Entretantu, Populasaun Timór-Leste tinan 2019 tuir dadus versaun https://countrymeters.info/pt/Timor-Leste nina iha 1.289.084.
Jornalista: Rafy Belo
Editór: Francisco Simões
