Câmara de Contas Husu Instituisaun Estadu Ezekuta Osan Tuir Planu
DILI,(TATOLI)-Câmara de Contas husu ba instituisaun estadu atu ezekuta osan estadu nian tu’ir planu.
Lia hirak ne’e hato’o hosi Prezidente Komisaun Funsaun Públika (CFP-sigla portugés), Faustino Cardoso, bainhira organiza enkontru nivel inspetór, auditorés hosi liña ministeriál ne’ebé marka mós prezensa ekipa tékniku Câmara de Contas, Kuarta (24/4/2019), iha Edifísiu KFP, Matadoru, Dili.
Pedidu Câmara de Contas refere liuliu ba ajénsia autónomu hodi rekolla reseita tuir prosedimentu legal katak depois rekolla tenke haruka ba kofre estadu antes ezekuta hodi evita mal jestaun no korrupsaun ba promove governasaun di’ak.
Câmara de Contas husu ba instituisaun hotu bainhira atu ezekuta planu no programa ho osan millions US$5 tenke aprezenta ba Câmara de Contas hodi halo fiskalizasaun molok implementa.
Enkontru ne’e, hodi fahe koñesimentu no esperiénsia ba malu kona-ba fiskalizasaun, inspesaun, auditoria interna no externa ho ninia segmentu no implikasaun legal no jurídika, sansaun sira atu hamutuk hadi’a jestaun estadu no konta estadu hodi promove boa governasaun.
“Ita nia estadu iha tiha ona sistema kontrolu, sistema ne’e ida mak kontrolu internal prezensa husi inspetorés no auditorés sira iha nivel ministériu ida-idak ninian no kontrolu external ho prezensa hosi Câmara de Contas, bazeia ba lei nú.9/2011 nian”, esplika Faustino Cardoso.
Câmara de Contas halo ona auditoria ba instituisaun estadu 19 inklui ba Komisaun Funsaun Públika bainhira hamriik iha tinan 2011 liu ba.
Jornalista: Agapito dos Santos
Editór: Francisco Simões
