2020, SEKOMS Garante TATOLI,IP Ezekuta Osan Mesak

DÍLI, 02 maiu 2019 (TATOLI)-Sekretariu Estadu Komunikasaun Sosial (SEKOMS), Merício Juvinal dos Reis Akara, husu ba Konsellu Diretivu TATOLI, institutu públika (IP) atu aproveita ho di’ak hodi aprende sistema no lala’ok ezekusaun orsamentu durante tranzisaun hosi SEKOMS.

“Tinan ida ne’e, preprasaun ho apoiu hosi SEKOMS atu tinan oin, bele jere rasik orsamentu. Tanba ne’e, ita bo’ot (TATOLI,IP-red) tenke aproveita oportunidade hodi halo preparasaun di’ak”, informa Sekretariu Estadu Merício Juvinal dos Reis Akara, ohin, bainhira halo abertura ba sorumutuk konsolidasaun Ajensia TATOLI,IP ho tema “Konsolida Kbi’it Serbi Estadu” iha Otél Ramelau, Dili.
Intermus preparasaun, SEKOMS Merício Akara, propoin maka kria kondisaun, liuliu ekipamentu servisu, rekursu umanu, planu no programa sira.
SEKOMS Merício Akara, promete sei kontinua fo apoiu asistensia hosi agora no ba futuru, liuliu kona-ba polítika, jestaun ho finansiamentu, maske TATOLI iha ona rekursu umanu naton hodi jere instituisaun ne’e.
Merício Akara hateten, konfiansa ne’e akontese tanba liuhosi rezultadu servisu ne’ebe Konsellu Diretiva no estrutura sira hatudu durante tinan 2019, no fiar metin ho prezensa jornalista rekrutadu foun na’in neen (6) ne’e sei desenvolve diak liután instituisaun estadu ne’e intermus públikasaun notisia ho faktual no kredivel.
Nia lia tun dehan, jornalista Ajénsia TATOLI la’os atu públika informasaun iha rai laran, maibé bele asumi mos responsabilidade nu’udar duta diplomata hodi transforma no públika informasaun estadu ba rai liur.
Iha okaziaun hanesan, Prezidente TATOLI,IP, José da Costa, garante hodi asegura konfiansa governu nian atu iha poder masimu hodi ezekuta orsamentu jeral estadu.
“Ami asegura konfiansa hosi SEKOMS nian durante ami ninia mandatu atu servisu di’ak liután ho profesionál hodi serví ita nia estadu”, hateten José da Costa.
Bazeia ba estatuto ne’ebé estabelese iha TATOLI,IP maka Konsellu Diretivu tenke priense estrutura institusaun ne’e, hanesan Diretora Ezekutiva ba Produsaun no Informasaun, Editor Ezekutivu, editor notísia ho jornalista.
Jornalista: Agapito dos Santos
Editór: Francisco Simões

