Governu Kria Ona Tabela Presu Foun Ba Arrendamentu Rai Estadu

DILI, 09 Maiu 2019 (TATOLI)–Atu responde presu rai iha merkadu, ohin loron, Governu liuhosi Ministériu Justisa iha tempu besik sei implementa tabela foun arrendamentu rai no uma estadu ba públika hodi aumenta reseita ba kofre estadu.
Tuir Lei númeru 1/2003 no dekretu Lei nú19/2004 ne’ebé ko’alia kona-ba propriedade estadu no kobra arrendamentu la korresponde ona presu rai iha merkadu ohin loron.
“Tabela rai ne’e halo tiha ona no ha’u seidauk públika ba públiku”, hateten Ministru Justisa, Manuel Cárceres da Costa, hodi responde Ajénsia TATOLI, ohin, iha nia servisu fatin, Dili.
Ministru Manuel Cárceres, garante katak, tabela foun ne’e sei apoiu governu atu fó arrendamentu rai bazeia presu merkadu tuir lokalizasaun.
“Rai sira iha Farol, Tasi Ibun, Praia dos Qoqeros, selu labele hanesan ho rai sira iha Taibessi, Ai-Turi Laran. Nune’e mós, rai sira iha Colmera selu labele hanesan ho Bairru Pité. Buat hotu selu tuir zona A, zona B, C, D”, esplika Ministru Manuel Cárceres.
Arrendamentu ba rai sira ne’ebé tama iha kategoria Zona A tanba loron-loron hala’o atividade komersiál. Mezmu, iha ona tabela foun, maibé Ministru Manuel Cárceres seidauk bele esklarese presu ne’e ba públiku tanba sei haruka ba xefe governu.
Jornalista : Agapito dos Santos
Editór : Francisco Simões

