Primeiru-Ministru Seidauk Simu Pedidu Sosa Pistola ba PCIC

DILI, 16 maiu 2019 (TATOLI)-Primeiru-Ministru, Taur Matan Ruak, ohin, informa katak, nia parte seidauk simu proposta hosi Ministériu Justisa, kona-ba planu atu sosa pistola hamutuk lolon 100 hodi apoiu ba servisu Polícia Ciêntífica de Investigação Criminal (PCIC).
“Pedidu mai ha’u nia gabinete seidauk, maibé ha’u haree fali iha jornál tanba ne’e ha’u seidauk iha opiniaun ida formuladu, kuandu naturalmente iha entaun desizaun sei iha Konsellu Ministru”, informa Primeiru-Ministru Taur Matan Ruak, hodi responde Jornalista sira hafoin hasoru malu ho Prezidente Repúblika, Francisco Guterres Lú Olo, iha Palásiu Prezidensiál, Bairru-Pité, Dili.
Planu governu sosa pistola ne’e, bazeia ba dekretu lei Númeru 15/2014, 14 Maiu, Kona-ba Orgánika PCIC ne’ebé sita iha artigu 20, uzu no porte ba arma, hatete, Autoridade polísia kriminál sira, pesoál investigasaun kriminál no pesoál ausiliár investigasaun kriminál nian iha direitu ba uzu no porte ba kilat servisu nian, kalibre no tipu ida ne’ebé diploma ministerial ministru justisa nian.
Primeiru-Ministru Taur Matan Ruak, aprofunda katak, PCIC bele kaer kilat tanba treinadu hodi uza. Tanba ne’e, liuhosi orsamentu 2019 ne’ebé aloka ba PCIC iha kapitál Menór iha item ekipamentu seguransa prevee ona millaun US$100.
Notísia relevante: – http://www.tatoli.tl/2019/05/governu-aprova-pedidu-sosa-kilat-ba-pcic/
– http://www.tatoli.tl/2019/05/konsellu-ministru-mak-bele-desidi-pcic-lori-pistola/
Jornalista : Agapito dos Santos
Editór : Francisco Simões

