DILI, 16 maiu 2919 (TATOLI)—Governu liuhusi Ministériu Ensiñu Superiór, Siénsia no Kultura (MESSK), promete hasa’e kualidade iha ensiñu superiór.
“Ha’u hakarak serbisu hamutuk ho universitáriu, institutu sira tantu públiku no privadu, atu ita hamutuk hadi’a kualidade sistema ensiñu superiór,” Ministru Ensiñu Superiór, Siénsia no Kultura, Longuinhos dos Santos, ko’alia asuntu ne’e bainhira halibur ideia hosi magnífiku reitór, pro-reitór no vise Reitór, kona-ba atu estabelese Konsellu Reitoria, iha salaun Fundu Dezenvolvimentu Kapitál Umanu (FDCH- sigla portugés), Palásiu Governu, kinta (16/5/2019).
Nia dehan, tenke hadi’a sistema edukasaun iha ensiñu superiór ho di’ak liu, maibé presiza konsellu ida forte hodi tau matan ba buat hotu. Tanba ne’e, nia hatutan, VIII Governu Konstitusionál iha ona polítika atu harii Konsellu Reitoria. Konsellu ne’e sai hanesan órgaun konsultivu ba universidade hotu-hotu.
“Ministériu Ensiñu Superiór, Siénsia no Kultura hakarak dezenvolve serbisu hamutuk kultura ida ne’ebé ho estrutura serbisu hamutuk, haburas no promove diskusaun,” Longuinhos esplika.
Nia informa, atu atinje polítika hirak ne’e, presiza rekursu umanu kada universidade ne’ebé natón atu bele la’o hamutuk.
“Ministériu Ensiñu Superiór hakarak ajuda instituisaun hotu-hotu. Ezemplu, atu fó bolsu estudu para kapasita no eleva liliu dosente sira tanba garante kualidade ida mak profesór sira,” nia subliña.
Ministru ne’e mós promete kria kurríkulu ida ho padraun mínimu ba ensiñu superiór. Nune’e mós sei halo elaborasaun ba Lei Baze Edukasaun ba ensiñu superiór. Ensiñu Superiór iha territóriu nasionál ne’ebé pertense ba públiku mak Universidade Nacional Timor Lorosa’e (UNTL) ho Institutu Politéknika Betano (IPB).
Ensiñu Superiór privadu mak hanesan Universidade da Paz (UNPAZ), Universidade de Dili (UNDIL), Dili Institute of Tehcnology (DIT), Institute of Business (IOB), Universidade Orientál Timor Lorosa’e (UNITAL). Nune’e mós Instituto Superior Cristal (ISC), Instituto Ciência de Saúde (ICS), East Timor Coffee Institute (ETCI), Instituto Católica Para Formação de Professional (ICFP) no Instituto Professional de Canossa (IPDC).
Jornalista: Evaristo Soares Martins
Editór: Xisto Freitas
