MTK Sei Aselera Konstrusaun Aeroportu Prezidente Nicolau Lobato

DILI, 27 maiu 2019 (TATOLI)-Ministériu Transporte no Komunikasaun (MTK) kontinua tau atensaun no aselera prosesu konstrusaun ba Aeroportu Internasionál Prezidente Nicolau Lobato, Dili.

Ministru Transporte no Komunikasaun, José Agostinho da Silva, informa, daudaun ne’e Ministru Negósiu Estranjeiru no Kooperasaun (MNEK), halo ona prosesu ba atu troka nota entendimentu ho Governu Japaun ne’ebé sei asina iha futuru.
“Prosesu ne’e lao hela iha MNEK atu realiza troka nota entendimentu ne’e, bainhira realiza entaun schedule kona-ba prosesu konstrusaun ne’e sei lao lais liu,” informa Ministru José Agostinho da Silva, ohin, ba jornalista sira, hafoin hasoru malu ho Primeiru-Ministru, Taur Matan Ruak, iha Palásiu Governu.
Iha hasoru malu ne’e, Primeiru-Ministru, Taur Matan Ruak, fó orientasaun ba Ministru, José Agostinho da Silva, hodi aselera prosesu finalizasaun ba kooperasaun ho governu Japaun hodi hahú implementa prosesu konstrusaun ba aeroportu internasionál ne’e.
Governu Japaun deside ona sei apoiu osan millaun $44 hodi halo konstrusaun ba aeroportu internasionál Prezidente Nicolau Lobato, tanba ne’e, MNEK halo hela prosesu ba atu troka nota entendimentu entre Governu Timor-Leste ho Governu Japaun.
Jornalista : Agapito dos Santos
Editór : Francisco Simões

