Portugal Sei Apoia Formasaun iha Area Transporte no Komunikasaun

DILI, 27 maiu 2019 (TATOLI)-Governu Portugal iha nia kompromisu no interese hakarak apoia fó formasaun ba funsionáriu sira iha area transporte no komunikasaun.
Kompromisu Governu Portugal nian ne’e aprezenta diretamente hosi Ministru Infraestrutura no Abitasaun, Sekretáriu Estadu Komunikasaun no Sekretáriu Estadu Transporte Portugal nian bainhira hasoru malu ho Ministru Transporte no Komunikasaun (MTK), José Agostinho da Silva, semana kotuk, iha Lizboa-Portugal.
“Governu Portugal iha espíritu boa-vontade tomak atu fó apoia ba governu Timor-Leste iha area transporte no telekomunikasaun. Sira prontu fó asisténsia téknika no formasaun ba kapasitasaun,” informa Ministru José Agostinho da Silva, ba Jornalista sira, ohin, hafoin relata rezultadu vizita traballu ba Portugal nian ba Primeiru-Ministru, Taur Matan Ruak, iha Palásiu Governu.
Durante estadia iha Lizboa, Ministru José Agostinho da Silva, ho ekipa hasoru malu ho autoridade reguladóra komunikasaun Portugal (ANAKOM) tanba sira iha interese atu apoia téknika ba autoridade nasionál ba komunikasaun Timor-Leste (ANC-sigla Portugés).
Alende ne’e, Ministru ho ekipa halo vizita ida ba kompañia aero Portugal Seven Air ne’ebé iha mós interese atu loke eskola pilotu iha nasaun foun ne’e.
José Agostinho da Silva hatutan, governu sei esplora kompromisu hirak ne’e, liuliu atu ajuda téknika ba TL intermus kria sistema komunikasaun ba ANC no hadi’a polítika transporte aero, marítima no terrestre.
Jose Agostinho mós halo mós vizita traballu ba autoridade Portuária hodi haree di’ak liután jestaun portuária iha Portugal hodi implementa mós iha Timor-Leste.
Nia dehan, Governu Timor-Leste sei estuda posibilidade hirak ne’e hodi estabelese kooperasaun ho Governu no ajénsia sira Portugal nian iha futuru.
Jornalista : Agapito dos Santos
Editór : Francisco Simões

