DILI, 30 maiu 2019 (TATOLI)—Membru Unidade Polísia Militár (PM) realiza treinamentu razia ka check point tránzitu nian nu’udar preparasaun ida atu partisipa iha operasaun konjunta entre FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) hodi kontrola ema sivíl, militár no polísia ne’ebé uza transporte bele kumpri regra tránzitu.
Formasaun ne’ebé atribui ba membru PM sira ne’e orientadu liu oinsá halo atividade check point no patrollamentu kontrola movimentu transporte rodoviária sira atu la’o ho disiplina.
Komandante Unidade Polísia Militár, Majór Abel da Costa Xavier “Niki” dehan, formasaun ne’e hodi responde mós preokupasaun públiku katak dala barak iha membru F-FDTL balun lori karreta laiha karta kondusaun, xapa matríkula karreta no motór laiha. Tanba ne’e, PM halo treinamentu tuir órden Xefe Estadu Maior Jenerál F-FDTL, Majór Jenerál Lere Anan Timur hodi haree problema ne’e bele regula militár hotu-hotu tenki respeita regra tránzitu nian.
“Ita-nia Polísia Militár sira tuir treinamentu check point tránzitu nian para kontrola ita-nia maluk sira lori karreta ho motór la uza karta kondisaun no xapa ka kapasete. Ita sei prende no orienta sira tenki disiplina bainhira uza transporte,” dehan Majór Niki ba jornalista iha edifísiu PM, Kintál-Boot, Dili, ohin.
Tuir nia katak kooperasaun PM no Polísia Tránzitu importante atu regula ema hotu la’o disiplina no respeita regra tránzitu nian. Niki hatutan, bainhira F-FDTL no PNTL halo operasaun maka identifika polísia ida viola regra sei entrega ba polísia mak prosesa no membru F-FDTL entrega ba PM mak prosesa.
Ho atividade treinamentu ne’e, Komandu Polísia Militár mós aviza ba unidade F-FDTL hotu- hotu atu disiplina no koopera ho polísia no bainhira viola regra labele koko halo forsa, tanba PM sei kontrola.
“Majór Jenerál Lere hato’o ona apelu atu militár hotu-hotu kumpri regra uza karreta no motór. Militár tenki iha dokumentu kompletu tuir regra,” nia alerta.
Treinamentu ne’e hala’o direta hosi Instrutór Militár Brazíl nian ho durasaun semana ida atu membru PM sira iha koñesimentu kle’an molok implementa serbisu.
Jornalista: Eugénia Pereira
Editór: Xisto Freitas
