DILI, 31 maiu 2019 (TATOLI) – Atu evita ema tama-sai Timor-Leste ho livre no lori sasán kontra bandu, maka Servisu Migrasaun tenke kontrola maka’as.
Prezidente Komisaun A Parlamentu Nasionál (PN) ne’ebé trata asuntu Konstitusionál no Justisa, Carmelita Caetano Moniz, husu ba Servisu Migrasaun iha fronteira atu kontrola maka’as ba ema ne’ebé tama sai mai Timor-Leste no ba Atambua-Indonézia.
“Ita mós iha mákina bele deteta iha fronteira Mota-Ain, Salele nian, Batugadé nian, maibé nusa maka ita nia labele deteta hafoin ba ema Indonézia maka foin kaer kona, Servisu Migrasaun tenke halo kontrolu di’ak, se la’e ema tama sai tuir sira nia hakarak,” afirma Deputada Carmelita Moniz, ohin, iha Parlamentu Nasionál.
Nia mensiona katak, Servisu Migrasaun maka tenke forte, kontrolu maka’as, tanba saida maka ema sai ho droga, la kaer kona maske iha fronteira terrestre Timor-Leste nian iha mákina X-Rey.
Membru Parlamentu Nasionál husu ba autoridade kompetente atu servisu ho sinseridade, tanba ai-moruk at sira ne’e liuhosi Timor-Leste mós la konsege kaer, maibé ba kaer fali iha ema nia Servisu Migrasaun.
“Ita ema uitoan de’it, hahalok ne’e halo ita triste, nune’e maka ita tenke tau ita nia an katak osan la’ós buat hotu maibé dignidade maka as liu buat hotu,” hateten Deputada Carmelita Moniz.
Jornalista : Zezito Silva
Editór : Francisco Simões
