DILI, 03 juñu 2019 (TATOLI)—Polísia Nasionál Serbisu Investigasaun Kriminál (PNSIK) iha loron kinta (30 maiu 2019 liu-ba), prende ona sidadaun Filipina na’in tolu ho inisiál JGB nu’udar patraun Kompañia Juk International Movers ho nia espoza M no ida tan tanba suspeitu na’in ba droga ne’ebé kazál JSP no AS lori ba Kúpaun-Indonézia.
Aimoruk sira ne’e lori tama husi rai li’ur mai Timor-Leste ho aviaun Sriwijaya iha fulan marsu 2019 nia laran to’o mai Aeroportu Internasionál Dili rai iha edifísiu Kompañia Juk International Movers ne’ebé lokaliza iha Fomento, Comoro, Dili, ho objetivu haruka ba Kúpaun-Indonézia.
Aimoruk ne’e Autoridade Alfándega Indonézia sita ho tipu musan hamutuk 4.874 subar iha mákina impresora mutin marka EPSON A4 iha loron kuarta (29/5/2019) liu-ba.
Relasiona ho aimoruk ne’e, PNSIK prende ona suspeitu na’in tolu, no halo kedas investigasaun, agora detein hela iha sela Polísia Munisípiu Dili hodi hein prosesu julgamentu ne’ebé sei hala’o iha segunda (03/06) ne’e tuku 16:00 iha Tribunál Distritál Dili.
“Ema na’in tolu ne’e ami kaptura (prende) ona. Agora hein prosesu julgamentu iha Tribunál Dili ohin loraik ne’e,” dehan Komandante PNSIK, Superintendente Jorge Monteiro, bainhira dadalia ho jornalista-sira iha edifísiu Komandu Jerál PNTL, Caicoli, Dili, ohin.
Jornalista: Eugénio Pereira
Editór: Xisto Freitas
Lee mós notísia iha kraik ne’e…
http://www.tatoli.tl/2019/06/kazu-lori-droga-familia-ezije-liberta-jsp-no/
