BNCTL Iha Ona Asset Millaun $140-Resin

DILI, 04 juñu 2019 (TATOLI)-Dezde 2011 hala’o knar hanesan banku úniku estadu nian to’o mai 2018, Banku Nasionál Komérsiu Timor-Leste (BNCTL-sigla portugés) iha ona asset millaun $140-resin.
“Hosi 2011 banku nia asset purvolta millaun $20 maibé agora to’o 2018 millaun $140-resin depois mobilizasaun depózitu no kréditu aumenta beibeik hosi tinan ba tinan,” informaPrezidente Konsellu Administrasaun BNCTL, Brígido de Sousa, ba Jornalista sira hafoin relata dezafiu no susesu BNCTL ba Prezidente Repúblika, Francisco Guterres Lú Olo, ohin, iha Palásiu Prezidensiál, Bairru-Pité, Dili.
BNCTL iha sukursál iha munisipiu 12, inklui Rejiaun Administrativu Espesiál Oe-Cusse Ambeno (RAEOA). BNCTL mós iha banka movel, estabelesimentu ATM 30-resin iha Dili no sei aumenta tan no oras ne’e dezenvolve hela internet banking.
Total kliente ne’ebé asesu kréditu ativu oras ne’e hamutuk rihun 17 ho orsamentu hamutuk millaun $80. Enkuantu, mobilizasaun depózitu hosi Banku millaun $100- resin.
“Jurus ba Kréditu ne’e entre porsentu 6 to’o porsentu 12. BNCTL fó ona kréditu ba agrikultór kafé sira iha Ermera hodi hola mákina dulas kafé, agora hahú fó kréditu ba tratór liman ho mákina sira,” informa Brígido de Sousa.
Jornalista : Agapito dos Santos
Editór : Francisco Simões

