Guiné-Bissau Iha Interese Hametin Kooperasaun ho TL

DILI, 4 juñu 2019 (TATOLI)-Prezidente Repúblika Guiné-Bissau, José Mário Vaz, iha interese atu kontinua hametin kooperasaun bilaterál ho Timor-Leste.
Liuhosi sorumutuk Enviadu Espesiál Prezidente Repúblika Guiné-Bissau, António Pedro Gomes ne’ebé akompaña hosi Embaixada Guinea-Bissau ba Indonesia, Carlos Antonio Moreno, ho Prezidente Repúblika, Francisco Guterres Lú Olo, ohin, iha Palásiu Prezidensiál, transmite mensajen Prezidente José Mário Vaz nia vontade atu aprofunda kooperasaun institusionál ho Timor-Leste iha futuru
“Nu’udar portavós Prezidente Guiné-Bissau lori mensajen Prezidente Guiné-Bissau mai hato’o ba Prezidente Repúblika, Francisco Guterres Lú Olo, kona-ba relasaun institutional no kooperasaun bilateral,” informa António Pedro Gomes.
Iha tinan 2013, Governu Timor Leste apoiu orsamentu millaun $6 no mós estabelese Gabinete Tékniku apoiu ba prosesu eleitorál ne’ebé lidera eis Ministru Administrasaun Estatál, Tomas Cabral, hodi halo prosesu resenseamentu eleitorál ba eleisaun jerál 2014 iha Guiné-Bissau.
Iha loron 03 outubru 2018, Governu Timor-Leste liuhosi reuniaun Konsellu Ministru aprova tan oitu mill dollar ba prosesu resenseamentu hanesan.
Jornalista : Agapito dos Santos
Editór : Francisco Simões

