DILI, 4 juñu 2019 (TATOLI)—To’o agora, Komandu Polísia Nasionál Timor-Leste (PNTL) seidauk asina akordu extradisaun ho kualkér nasaun inklui governu no Polísia Indonézia kona-ba mekanizmu lori fila timoroan sira ne’ebé komete iha kazu krime droga hodi fila mai halo julgamentu iha Timor-Leste.
Akordu estradisaun nu’udar meiu ida atu fasilita nasaun ida halo prosesu judisiáriu ba ema ruma ne’ebé involve iha kazu krime droga ka kazu seluk bainhira halai ba subar iha nasaun viziñu ruma sei la livre, tanba estradisaun fasilita polísia rai seluk sei kaer no lori fila.
“Ita iha Timor-Leste to’o agora seidauk halo akordu estradisaun ho nasaun sé de’it inklui Indonézia ita laiha akordu,” dehan Komandante Jerál Polísia Nasionál Timor-Leste (PNTL), Komisáriu Faustino da Costa ba Agência Tatoli iha kuartel jerál PNTL, ohin.
Nia haktuir, kazu ne’e autoridade Alfándega Mota-ain, Indonézia, mak kaptura entrega ona ba Badan Narkotika Nasional (BNN) Indonézia atu prosesa tuir lei Indonézia nian. “Kazu ne’e agora Badan Narkotika Nasional (BNN) mak prosesa,” nia esplika.
Komandante hatutan, agora atu lori fila autór kazál JSP no AS fila ne’e depende ba loby ka diplomasia polítika entre Estadu Timor-Leste no Estadu Indonézia mak tenki deskuti oinsá Estadu Timor-Leste bele akompañia nia sidadaun tuir lei.
Faustinho hatutan, akordu estradisaun ne’e bele halo entre Estadu ho Estadu, bele mós polísia ho polísia atu fasilita nasaun ida hodi husu ba nasaun seluk atu kaer autór krime ne’ebé halai hosi nasaun ida ba nasaun seluk bele haruka fila.
“Sé timoroan mak halo problema iha Indonézia hanesan agora, governu Timor-Leste bele husu ba Indonézia para juglamentu prosesu halo iha Timor-Leste tuir lei,” nia informa.
Entretantu, Tribunál Dili hamonu ona medida kausaun prizaun preventiva ba arguidu JB nu’udar Diretór Kompañia JVK International Movers ne’ebé hanesan na’in ba aimoruk droga ne’ebé fasilita nia traballadór kondenadu JSP ho nia kaben AS ho musan hamutuk 4.874 lori ba Indonézia. Aimoruk ne’e ikus mai tetu hamutuk kilógrama 1.861 mak tama ba Kúpaun-Indonézia iha loron kuarta (29/05/2019) liu-ba.
Oras ne’e dadaun, kondenadu rua Polísia Indonézia lori ona ba Kúpaun hodi hein prosesu juglamentu.
Jornalista: Eugénio Pereira
Editór: Xisto Freitas
Lee mós notísia iha kraik…
http://www.tatoli.tl/2019/06/kazu-fasilita-droga-ba-indonezia-arguidu-jb-tama-prizaun-rua-seluk-tir/
