Governu Husu Portugál Extende Projetu CAFE To’o 2020

DILI, 05 juñu 2019 (TATOLI)-Governu Timor-Leste liuhosi Ministériu Edukasaun, Juventude no Desportu husu ona ba governu Portugál atu extende tan projetu Sentru Aprendizajen Informasaun Edukasaun (CAFE-sigla portugés).
Akordu governu rua nian kona-ba projetu CAFE ne’e sei remata iha dezembru 2019 no Governu Timor-Leste husu ba Portugál atu extende tan to’o tinan oin 2020.
Projetu kooperasaun ne’e lao ona durante tinan 10 hodi haruka profesores Portuguese’s sira mai hanorin iha eskola CAFE ne’ebé estabelese iha munisipiu 12 inklui Rejiaun Administrativa Espesiál Oe-Cusse Ambeno (RAEOA).
“Ohin, Prezidente Repúblika bolu ha’u mai fó esplikasaun kona-ba projetu CAFE hodi husu kona-ba projetu ne’e tanba sei remata iha Dezembru 2019,” informa Ministra Edukasaun, Juventude no Desportu Dulce de Jesus Soares, ohin, hafoin relata projetu CAFE ne’e ba Prezidente Repúblika, Francisco Guterres Lu Olo iha Palásiu Prezidensiál, Bairru-Pité, Dili.
MEJD hatete, presiza tebes hanaruk akordu ne’e to’o tinan oin tanba Governu hakarak atu halo avaliasaun profunda ba rezultadu implementasaun ba projetu ne’ebé lao ona durante tinan 10 hodi hadi’a di’ak liután iha akordu foun iha futuru.
“Ami husu ona ba governu Portugál liuhosi Embaixada Portugál iha Timor-Leste atu extende ba 2020 tanba sei presiza tempu atu halo avaliasaun externa ba projetu ne’e,” informa Dulce de Jesus Soares.
Nia dehan, projetu ne’e tenke hanaruk tan iha futuru tanba rezultadu hosi projetu ne’e maka estudante rihun 7 resin maka oras ne’e eskola iha eskola CAFE no bele ko’alia lian portugés ho kualidade di’ak.
Prezidente Repúblikarekomenda ba MEJD atu husu ba governu Portugál hodi haruka profesores sira mai timor leste tenke sedu no tuir kalendáriu ano letivu hahú iha janeiru tanba durante ne’e akontese profesores Portuguese’s sira atraza to’o marsu foin to’o iha Timor-Leste.
Jornalista : Agapito dos Santos
Editór : Francisco Simões

