DILI, 4 juñu 2019 (TATOLI)—Hahú kedas iha tinan 2000 to’o agora, Komandu Polísia Nasionál Timor-Leste (PNTL) hala’o nia kna’ar tuir Konstituisaun artigu 147 katak polísia defende legalidade demokrátika no garante seguransa interna ba sidadaun hotu no la inklina ba kualkér grupu polítiku. Prevensaun krime tenke bazeia ba respeitu direitu umanu no lei mak determina regra, regulamentu ba polísia no forsa seguransa no mós forsa sira seluk.
Ho kna’ar hirak ne’e, iha 18 fevereiru 2009, Governu Timor-Leste hasai hikas Lei Orgánika PNTL nian ida ne’ebé uza to’o ohin loron no Komandu PNTL rasik to’o agora seidauk iha estatutu própriu.
Nune’e, hahú iha tinan 2015 nia laran, Komandu PNTL harii ona ekipa independente ne’ebé involve Governu Timor-Leste hodi prepara estatutu PNTL foun inklui lei orgánika PNTL no revee regulamentu disiplinár ne’ebé sei aumenta artigu balun hodi fó kompeténsia ba Departamentu Justisa atu uza regulamentu foun sira sai “nehan” kro’at ida ba Departamentu Justisa hala’o kna’ar no ezekuta misaun sira ne’ebé iha relasaun ho justisa no kestaun disiplinár sira tenke tuir nórma sira konstituisaun nian, lei no diretiva sira ne’ebé vigora iha RDTL.
Aleinde ne’e, Komandu PNTL sei haforsa serbisu Unidade Patrollamentu Fronteira (UPF) no Serbisu Ofisiál Polísia Suku (OPS) liuhusi hadi’a kondisaun infraestrutura no kapasita rekursu umanu no fasilidade serbisu.
Tinan 2019 ba oin, nu’udar tinan mudansa ba instituisaun PNTL hodi hato’o ona proposta ba Governu liuhusi Ministériu Interiór atu muda naran Unidade Polísia Marítima (UPM) ba Unidade Seguransa Kosteira (USC-sigla portugés) no hamosu tan Departamentu Tránzitu Kontrolu Auto Estrada (UDTKAE) no Unidade Fraude Fiskál (UFK).
Atu hatene kle’an planu preparasaun serbisu Komandu PNTL, tuir mai bele akompaña entrevista eskluzivu ne’ebé jornalista Agência TATOLI, I.P halo ho Komandante Polísia Nasionál Timor Leste (Komjer-PNTL), Komisáriu Faustinho da Costa iha nia serbisu fatin, tersa (04/6).
TATOLI: Iha Polítika VIII Governu Konstitusionál iha tinan ne’e ba oin, sei revee lejizlasaun sira iha PNTL hanesan Lei Orgánika, Estatutu no Regulamentu Disiplinár PNTL. Oinsá Komandu PNTL nia haree ba polítika ne’e rasik?
Komjer Faustino da Costa: Planu kona-ba revizaun ba lei ne’ebé liga ho kna’ar polísia hodi regulariza atitudi membru polísia nian ne’e buat importante. Agradese ba governu tanba tau atensaun ba serbisu PNTL. Ami eziste tinan 19 ona maibé PNTL rasik seidauk iha estatutu própriu. Entaun, hahú 2015 kedas, ami hamosu ekipa iha PNTL para halo diskusaun nune’e PNTL bele iha estatutu rasik.
Nune’e mós, lei orgánika polísia ne’e dependente ho dezenvolvimentu no evolusaun. Lei orgánika ne’ebé PNTL iha moris iha tinan 2009. Agora tinan 2019, signifika lei ne’e kuaze tinan 15 ona presiza iha ajustamentu ba iha ninia estrutura ne’e rasik. Iha tinan 2018, PNTL rasik hamosu ona ekipa atu haree oinsá mak ajusta lei orgánika PNTL mai hosi inisiativa eis Komandante Jerál, Komisáriu Júlio Hornay hodi iha tinan 2015 ne’e instala ona komisaun atu haree fila fali lei orgánika PNTL 2019 bele halo revizaun hodi halo diskusaun ida kle’an para bele hetan aprovasaun iha Konsellu Ministru.
Regulamentu disiplinár polísia nian ne’ebé implementa hela ne’e hamosu iha Dekretu Lei Nú. 13/2004, 16 juñu. Agora, iha tinan 2019, konta ba tinan 15 nia laran implementa regulamentu ne’e ha’u hanoin presiza iha mudansa ba lei hirak ne’e. Se lei ida ho tinan 15, signifika lei ne’e ita hanoin iha tinan 15 liu-ba ne’e hanesan hela ho situasaun ida agora ne’e. Buat sira ne’e hotu mak sai referénsia ida ba ha’u bainhira VIII Governu tau fiar lidera instituisaun PNTL iha entidade órgaun soberanu sira iha 27 marsu 2019, ha’u tau hanoin ida iha planu katak 2019 ne’e tinan mudansa ba instituisaun PNTL.
Agora, mudansa ida ne’ebé ami hanoin ne’e mak reforma iha ita-nia karáter atendimentu, atuasaun membru iha terrenu ho disiplina hodi ita ezije ida kualidade ba iha atendimentu sira. Ami hato’o mós proposta ba programa ne’ebé ami halo ona dezde 2015 sa’e mai ami nafatin aprezenta ba Governu atu halo mudansa ba estrutura no lei organiza, tanba presiza halo revizaun para revee ba lei orgánika ne’e liuhosi Ministru Interiór, Filomeno da Paixão de Jesus bele haree.
Ami mós komesa halo mudansa ba kna’ar komandante sira halo serbisu iha fatin (munisípiu) ruma labele kle’ur liu, entaun fasil atu kontrolu. Ami hasai ona regulamentu ida kona-ba kolokasaun komandante sira ba serbisu iha munisípiu kle’ur liu tinan tolu (3). Ne’e para ita evita ema ne’e iha fatin para sempre. Atu nune’e ema foun ruma ita troka karik nia sai komandante ida nia mai ho ninia planu no programa no ideia foun ne’ebé di’ak para bele dezenvolve serbisu instituisaun PNTL.
Intensaun seluk ida tan mak ita aproveita atu apriende kultura ida foun ho dialetu ida foun aumenta ita-nia koñesimentu serbisu iha kada munisípiu ne’ebé diferente. Ne’ebé, komandante sira sei hala’o kna’ar ba ho di’ak ho komunidade no autoridade para lori susesu.
TATOLI: Bainhira mak Komandu PNTL sei aprezenta estatutu foun no Lei Orgánika PNTL ba Ministru Interiór para aprezenta ba Konsellu Ministru?
Komjer Faustino da Costa: Ami aprezenta ona ba ministru intermu diskusaun no verbálmente. Ministru mós preokupa liliu ba ezisténsia forsa Unidade Patrollamentu Fronteira (UPF) iha fronteira. Agora, UPF hala’o serbisu bazeia de’it ba lei orgánika (ne’e foti hosi IV Governu Konstitusionál nia Dekretu-Lei númeru 9/2009, loron-18 fulan Fevereiru kona-ba lei orgánika PNTL, artigu 33). Se ita foti hosi Konstituisaun artigu 147 ne’e ko’alia kona-ba kna’ar polísia nian ne’ebé mai hodi hamosu lei orgánika polísia nian no agora iha lei orgánika polísia nasionál artigu ida koloka kona-ba UPF ho nia misaun halo patrollamentu no vijilánsia iha fronteira. Tanba ne’e, bainhira deteta ema ruma ne’ebé hakat fronteira ho ilegálmente, UPF halo atendementu depois entrega ba komandu polísia prosesa tuir lei no koordena mós ho migrasaun, alfándega ne’ebé hala’o kna’ar iha ne’ebá.
Se UPF deteta ema balun tama ka sai ilegálmente la’ós sira nia kompeténsia atu investiga, maibé UPF imediatu foti inisiativa depois entrega ba autoridade Alfándega no karantina atu haree.
Aleinde ida ne’e, ami haree mós kna’ar Unidade Polísia Marítima (UPM) tuir Lei Orgánika PNTL, Dekretu-Lei 9/2009, Artigu 32 (1). Ita hotu akompaña UPM durante ne’e dalaruma tanba kestaun ida marítima ne’e ikus mai ema bolu dehan mariñeiru ka dalaruma ema interpreta dehan navál. Entaun, hanesan Komandante Jerál, ami hato’o ona proposta no hasa’e ona ba ministru atu labele iha miss interpretasaun kona-ba liafuan ida mariña, marítima ho navál. Tan ne’e, polísia ne’ebé ita koloka iha mariña ami troka fila fali (naran) hanesan proposta no ami laiha kompeténsia atu halo fali alterasaun no ami aprezenta ami nia proposta tau fali Unidade Seguransa Kosteira (USC). Ne’e para ita apár ho liafuan atu labele interpreta liafuan mariña no mariñeiru ka navál.
Proposta seluk ne’ebé ami hato’o mak karik ba futuru ita haree Timor-Leste iha ona auto estrada hosi Suai liga ba Kosta Súl Viqueque, ami hanoin atu presiza iha Unidade Tránzitu Nasionál (UTN) ne’ebé iha ninia departamentu própriu ita harii Unidade Departamentu Tránzitu Kontrolu Auto Estrada (UDTKAE) atu haree ba estrada. Pur-ezemplu, iha nasaun seluk, iha unidade ida ne’e. Tanba, Polísia Tránzitu ida ne’ebé halo patrulla iha auto estrada ne’e hanaran HV- Patroll. Ne’e duni, agora ita iha auto estrada iha Suai ba oin ita prepara mós ita nia polísia hodi haree karik lei orgánika PNTL aprova ona bele iha ona patrollamentu própriu atu halo kontrolu ba ita nia auto estrada.
Ami mós propoin atu hamosu tan Unidade Fraude Fiskál (UFK) nu’udar unidade ida atu haree problema sira hanesan iha ita-nia Timor kona-ba kazu pekulatu. Korrupsaun pasivu ativu durante ne’e só Polísia Serbisu Investigasaun Kriminál (PSIK) mak halo. Se ita hamosu UFK signifika ita bele haree kazu sira ne’e pasivu liu inklui haree ba kazu brankeamentu kapitál ne’ebé ami hato’o ba ministru bele haree no orienta saida mak asesór tékniku presiza, ita sei diskuti liu-tan.
TATOLI: Iha Planu Estratéjiku Dezenvolvimentu Nasionál (PEDN) PNTL nian 2011-2030, governu hakarak atu reforsa rekursu iha polísia komunitária. Oinsá Komandu nia haree?
Komjer Faustino da Costa: Iha semana ida liu-ba, hosi Unidade Planeamentu Monitorizasaun no Avaliasaun (UPMA) hasai ona sirkulár ida ba PNTL atu prepara ona planu prioridade polísia nian ba tinan 2020 ba oin ne’ebé iha planu prioridade ualu (8) mak ministru aprova ona. 1) haree ba dezenvolvimentu Polísiamentu Komunitáriu ita sei reforsa hadi’a dezenvolvimentu infraestrutura no rekursu oinsá Ofisiál Polísia Suku (OPS) bele la’o ho di’ak. 2) aumenta rekursu ba seguransa Rodoviáriu Tránzitu nian hodi tau-matan ba vítima sira ne’ebé hetan asidente rodoviáriu ne’e boot tebe-tebes, nune’e PNTL tau programa ne’e sai ajenda prioridade.
3) prioridade programa mak haree ba UPF ita reforsa sira-nia serbisu no atividade hadi’a sira nia kondisaun hodi halo vijilánsia no kria kondisaun infraestrutura iha fronteira hodi aumenta tan rekursu hodi asegura seguransa ho di’ak. Tanba membru UPF barak halo serbisu kondisaun mínimu tebes no serbisu kle’ur tebes. Tanba ne’e, ita hakarak haree ba oin se nia (polísia) serbisu iha UPF kle’ur liu ona tinan lima (5) to’o tinan 10 iha fatin hela de’it ita sei haree para hadi’a. 4) prgrama formasaun no kapasitasaun rekursu umanu ba área espesializada hodi responde ka atu atende kazu espesífiku sira hanesan krime organizadu brankaementu kapitál, kazu droga tráfiku umanu ne’ebé akontese entaun PNTL presiza duni formasaun iha área importante sira ne’e.
5) melloramentu ekipamentu, tanba se ita forma tiha ona ema sai matenek ho rekursu ne’ebé sufisiente, ita tenki investe mós iha ekipamentu hodi halo serbisu kontrolu ida di’ak ho profisionál liu-tan. 6) hamosu komisaun infraestrutura atu hadi’a kondisaun infraestrutura. Ita-nia nai ulun sira hatene hela iha eskuadra polísia sira kondisaun mukit no polísia iha munisípiu seidauk iha kazerna própriu fasilita serbisu. Aleinde ida ne’e, ita haree se ita tau OPS sai kestaun prioridade tenki investe mós ba serbisu polísia sira iha suku para halo serbisu besik liu-tan povu. Tanba ne’e, ita agradese tebes ba Governu Nova Zelándia bele apoiu serbisu OPS harii ona uma 14 no apoiu kapasita OPS sira no governu mós hanoin atu reforsa serbisu OPS liuhosi fasilidade no harii uma.
7) Ministru Interiór Interinu aprova ona kona-ba partisipasaun PNTL iha misaun pás nia iha Organizasaun Nasoins Unidas (ONU) nu’udar parte importante atu lori polísia halo serbisu misaun ONU nian hodi hala’o kna’ar iha Sudaun Súl no rai seluk tan no programa prioridade seluk tan.
Ho planu prioridade hirak ne’e mak Primeiru Ministru, Taur Matan Ruak rasik bolu ona ami hodi diskuti atu haree asuntu prioridade sira ne’e no governu hakarak haforsa apoiu iha OPS, UPF ne’ebé governu diskuti iha retiru VIII Governu nian hodi entrega mós áta hosi planu hirak ne’e hotu.
TATOLI: Hosi totál númeru OPS na’in 408 ne’ebé koloka ona iha suku OPS na’in 1 responsável ba suku 2 no ita haree rekursu sei menus tebes, no governu hanoin hosi unidade polísia barak ne’ebé iha sei muda balun iha OPS no Tránzitu Rodoviáriu. Oinsá Komandu nia haree?
Komjer Faustino da Costa: Loos duni. Ba kestaun ne’e, ha’u ho Ministru Interiór Interinu ami ko’alia ona. Agora, ha’u komesa retira ona membru sira hosi Unidade Polísia Fronteira (UPF). Dalaruma membru sira la’o ain to’o kilómetru 29 ho polísia ne’ebé ho idade tinan 57, 58 to’o membru balun tinan 60 ona. Ita haree sira nia idade katuas ona. Tanba ne’e, ita sei retira sira mai fali hala’o kna’ar iha ida-idak nia munisípiu haforsa iha OPS, KPK tanba sira iha esperiénsia oinsá mak ko’alia ho povu ho di’ak no reforsa iha tránzitu. Nune’e mós iha Unidade Polísia Espesiál (UPE), polísia balun idade liu ona tinan 60 ita sei muda sira ba munisípiu hodi halo serbisu reforsa iha OPS mak mak’as liu.
Ami mós propoin ba ministru iha tinan 2020 katak ba oin sei iha atividade urjente, tan ne’e ba oin ita presiza mós rekrutamentu ba polísia hodi reforsa númeru PNTL iha eskuadra balun ne’ebé seidauk sufisiente. Ministru rasik no primeiru-ministru haree hela kestaun ne’e hodi halo rekrutamentu PNTL no F-FDTL ne’e konjuntu dala ida no formasaun fulan tolu ne’e treinu hamutuk fíziku bele halo iha MetinarO no Sentru Treinamentu RairobO-Atabae. Treinamentu hotu ona mak foin fahe—ida ne’ebé ba polísia fila fali ba polísia no ida ne’ebé ba F-FDTL, fila fali ba F-FDTL.
Intensaun saida? Ninia benefísiu mak bainhira sira tuir formasaun hamutuk no halo serbisu iha terenu sira bele unidade tanba sira koñese malu ona hodi evita konflitu akontese entre forsa rua ne’e bele menus.
TATOLI: Regulamentu disiplinár PNTL tuir Dekretu Lei Nú. 13/2004, 16 juñu, katak presiza iha revizaun, tanba konsidera lei ne’e “fraku” iha implementasaun. Tuir ita-nia haree oinsá?
Komjer Faustino da Costa: Se ita haree lei ne’e hosi parte jurídiku nian, lei ne’e forte. Se ita haree hosi kultura ka karáter ita nian, ita hanoin presiza halo alterasaun. Pur-ezemplu, ita ko’alia kona-ba kultura hanesan inan no aman ida sira moris hamutuk sira iha oan. Sira iha responsabilidade atu hanorin oan sai matenek ka lae? Nune’e mós iha lei disiplina ne’e inan-aman iha oan tiha depois orsida ema seluk mak eduka ne’e mak’as liu. Entaun, Komandu labele fó suspensaun, tanba membru ne’e rasik bele halo nia karta rekursu ba tribunál rekursu. Pur-ezemplu, membru balun halo infrasaun halakon kilat ka uza sala kilat ne’ebé povu no Estadu nian, kuandu komandu foti ninia desizaun hanoin suspende ne’e todan ka bele hasai tiha membru ne’e hosi Instituisaun. Agora ne’e, só para rekomenda depois mak governu mak desidi. Aleinde governu mak desidi, ministru tutela loloos últimu instante ne’ebé atu bele halo desizaun, maibé membru ne’e rasik iha direitu nafatin atu lori prosesu ne’e ba Tribunál Primeira Instánsia no to’o Tribunál Rekursu. Signifika lei orgánika ne’e nia nehan (lei) la forte iha ne’ebá. Maibé, agora lei foun ne’e sei halo ninia medida ida forte atu regula ema hotu- hotu.
Ha’u rasik husu ona ba komandante sira labele ta’uk, tanba kompeténsia ne’ebé ita-boot sira iha lei fó ita-boot sira bele foti desizaun. Pur-ezemplu, agora, Komandante Eskuadra ida iha kompeténsia bele suspende nia membru sira to’o loron 30 ne’ebé agora hakerek iha regulamentu disiplinár nian. Maibé, lei orgánika la hateten katak komandante bele halo desizaun ida ne’e. Tanba ne’e, ha’u hanoin presiza halo revizaun ba lei disiplinár ne’e.
TATOLI: Tuir Ministru Defeza nia hanoin, regulamentu disiplinár PNTL nian tenki halo hanesan F-FDTL. Karik membru sira halo sala boot, komandante halo despaisu hato’o ba ministru mak foti desizaun hasai ne’e oinsá?
Komjer Faustino da Costa: Proposta ne’ebé Komandu hato’o ba ministru katak ba oin iha regulamentu disiplinár ne’e Departamentu Justisa hodi halo investigasaun tenki atribui tan sira nia kompeténsia ida hodi sira halo fiskalizasaun. Katak, Departamentu Justisa ninia ema sira presiza halo patrollamentu iha kalan no loron atu kontrola membru sira ne’ebé halo serbisu. Maibé, se nia (polísia) ba fali pasiar iha Timor Plaza ne’e viola ona regra. Ida ne’e mak propoin iha proposta alterasaun Departamentu Justisa atu halo serbisu ida ne’e. Aleinde ida ne’e, iha semana nia rohan, Departamentu Justisa sei halo mós patrollamentu ba iha bar ka festa sira hodi haree karik iha membru polísia ruma iha ne’ebá uza farda ka sein farda sira sei kontrola. Agora, kompeténsia ida ne’e mak durante ne’e laiha. Tanba ne’e, ami hamosu proposta hodi haree mós kestaun asuntu disiplinár ninia desizaun sei foti hosi segundu komandante jerál hodi membru ida labele lori fali prosesu ba tribunál.
TATOLI: Oinsá Komandu PNTL nia haree kona-ba polítika Governu Timor-Leste kona-ba Planeamentu Integradu?
Komjer Faustino da Costa: Ha’u tenta atu esplika katak dalaruma ita koko atu interpreta tenki halo di’ak. Tanba ha’u haree iha polítika governu regula kona-ba formasaun integradu entre F-FDTL no PNTL ne’e buat ida ne’ebé kapa’as tebes atu evita problema entre forsa rua, no lori forsa rua atu hamutuk. Agora, ho ezisténsia Autoridade Nasionál Marítima (ANM) iha lei hateten la’ós atu halakon kna’ar kompeténsia ne’ebé oras ne’e daudaun polísia marítima iha. Maibé, ANM ne’e serbisu integradu involve Polísia, F-FDTL, Alfándega no Migrasaun, Ministériu Agrikultura no Peska, Ministériu Komérsiu Indústria, Ministériu Finansa nia ema submete hotu iha ANM ne’e para halo serbisu konjuntu operasaun ruma iha tasi ibun mak hetan buat ruma automatikamente autoridade hotu-hotu ne’e hamutuk foti desizaun rezolve ba problema ema ruma hanesan pirata ka laiha dokumentu ekipa ne’e rezolve kedas ona.
TATOLI: Ita ko’alia kona-ba polítika integradu ne’e uluk mosu tiha ona Komandu Operasaun Konjuntu (KOK) ‘Halibur’ ne’ebé haktuir iha rezolusaun Governu númeru 3/2018, 17 fevereiru iha momentu ne’ebá. Vantajen saida mak Komandu PNTL hetan hosi esperiénsia durante serbisu hamutuk ho F-FDTL ne’e?
Komjer Faustino da Costa: Ha’u haree katak ida ne’e desizaun importante ida hosi polítika Estadu ka governu oinsá lori forsa rua atu serbisu hamutuk di’ak liu-tan. Oinsá mak membru polísia no F-FDTL bele halo treinamentu no patrollamentu ne’e buat di’ak ida hodi koordena malu entre Komandu PNTL no F-FDTL bele serbisu di’ak liu-tan atu garante pás no estabilidade.
TATOLI: Hafoin simu posu, Komandante rasik promete haforsa seguransa asegura Dili durante oras 24, maibé ita-nia povu kontinua preokupa no ta’uk la’o iha tempu kalan, tanba problema krimi ikus-ikus ne’e akontese maka’as tebes iha Dili to’o munisípiu sira to’o ema balun sai vítima mate no kanek. Ita-boot nia komentáriu?
Komjer Faustino da Costa: Ha’u ko’alia iha ha’u nia mandatu ita haree mós katak kestaun seguransa ne’e responsabilidade ba ema hotu-hotu. Labele haree de’it ba polísia. Ita timoroan tomak tenki hamutuk atu garante seguransa atu iha dame ba ita nia nasaun. Ha’u mós hasai despaisu ida ba komandante hasai membru unidade hodi ba reforsa serbisu iha OPS besik liu povu para ita bele minimiza krime ka kazu dezórden ne’ebé mosu, maski iha obstáklu maibé polísia halo esforsu atu garante pás.
Atu asegura seguransa ba komunidade iha kada suku, Komandu koloka OPS iha suku ida-idak atu nune’e bele halo prevensaun konflitu no ajuda xefe suku sira hodi rezolve problema. Timor-Leste iha suku hamutuk 442 no membru OPS hamutuk na’in 408 mak koloka ona iha suku. OPS na’in 1 responsavel ba suku 2 no sei kompleta tan. Munisípiu Bobonaru iha suku 50 maibé koloka de’it membru OPS na’in 43. Sei menus ema na’in 7. Munisípiu Baucau iha suku 59, membru OPS na’in 32. Sei menus na’in 27. Tan ne’e, presiza kompleta.
Atu kompleta númeru OPS ba suku hotu mak ita hanoin atu aumenta númeru bele koloka iha suku hotu, tanba munisípiu balun rai luan no distánsia dook nune’e ho númeru membru PNTL ne’ebé limitadu seidauk kobre komunidade hotu. Atu kontrola serbisu OPS nian mak ita harii tan KPK (Konsellu Polísiamentu Komunitária) no KDD (Konsellu Diretiva Distritál) hodi haree ba serbisu KPK nian.
KPK no KDD harii ona iha munisípiu 11, falta Lautem no Rejiaun Administrativa Espesiál Oé-Cusse Ambeno. OPS serbisu hamutuk ho xefe suku sira hodi asegura prevensaun krime iha suku, habelar informasaun kona-ba lei violénsia doméstika no lei sira seluk ne’ebé iha relasaun ho problema ne’ebé sempre akontese iha terrenu.
KPK nia kna’ar mak identifika problema oinsá bele rezolve iha suku, prioridade ba problema sivíl. Ezemplu, animál tama to’os no estraga aihan ne’ebé bele hamosu krime baku malu entre to’os na’in no animál nia na’in maibé sira rezolve ho mediasaun nune’e la akontese krime. Ezemplu seluk, identifika problema violénsia doméstika hodi ba eskuadra atu halo investigasaun hodi prosesa tuir lei.
OPS, KPK no KDD iha Departamentu Polísia Komunitária nia okos bazeia ba Lei Orgánika PNTL katak polísia komunitária nia serbisu mak atu hamutuk ho komunidade hodi asegura seguransa, prevensaun krime no seluk tan nune’e povu bele fó konfiansa ba polísia hodi moris iha pás no hakmatek nia laran.
OPS oras ne’e hasoru hela difikuldade kona-ba transporte, rádiu komunikasaun, hela fatin no orsamentu operasionál. Kona-ba fasilidade transporte, iha tinan 2014/2015, iha ona motorizada hamutuk 222 ne’ebé destaka ona iha munisípiu no suku balu iha futuru sei kontinua prevee hodi kompleta 442. Ko’alia kona-ba komunikasaun, iha rádiu komunikasaun balun ne’ebé prevee hosi doadór sira maibé presiza kompleta tan. Tuir planu komandu nian prevee rádiu komunikasaun no sim card ba OPS sira nune’e bele kontatu malu bainhira iha atividade no akontese problema ruma.
Kona-ba hela fatin ba OPS sira sai preokupasaun boot ba governu oinsá fó apoiu atu bele harii uma ba OPS sira iha munisípiu ida-idak nune’e sira bele serbisu iha komunidade nia leet.
TATOLI: Iha diskusaun nível polítika ne’ebé la’o hela atu reativa fila fali organizasaun arte marsiál sira. Komandu PNTL nia pontu devista?
Komjer Faustino da Costa: Atu reativa arte marsiál, ha’u hakarak dehan deklarasaun ka kompromisu polítika ne’ebé líder partidu polítiku sira halo iha tempu akompaña ne’e loos, no normál iha polítika. Maibé, keta haluha, lei númeru 5/2017 seidauk iha alterasaun katak lei númeru 5/2017 atu regula arte marsiál ne’e proibe atu halo atividade. Ha’u hanoin ema boot sira ko’alia de’it. Entaun, Polísia mantein hala’o nia kna’ar asegura seguransa tuir lei ne’e. Esetu lei ne’e hetan ona alterasaun ka mudansa katak arte marsiál sira ne’ebé bandu ne’e bele konsidera fila fali.
Ita haree mós iha parte defeza no seguransa nian, governu mós tuur-tuur la’ós naran atu reativa de’it, maibé sei análiza iha aspetu hotu depois mak sei aprezenta fali proposta ba lei ne’ebé Parlamentu Nasionál mak halo. Signifika, governu avalia sei fó paraser ba Parlamentu atu haree. Agora, se atu reativa fila fali, Komandu PNTL husu atu líder arte marsiál hotu-hotu nia membru tenki koopera ho polísia katak tama iha organizasaun uza hanesan eventu desportiva ida, la’ós uza fali organizasaun atu halo problema ruma. Organizasaun arte marsiál sira ne’e mós tenki koopera ho líder no autoridade suku para hamutuk asegura pás atu evita problema sira ne’e mosu beibeik.
Segundu, organizasaun arte marsiál sira tenki hatudu disiplina ne’ebé merese di’ak ba sira-nia organizasaun ba nasaun no sosiedade. Se ita hatudu asaun brutalizmu ka la disiplina, seráke ida ne’e governu atu reativa lalais? Ha’u hanoin la fásil! Tanba PNTL kontinua koopera ho F-FDTL atu garante seguransa ba Estadu no povu atu ita-nia atividade ekonomia no povu nia moris bele la’o iha pás sein problema oioin
TATOLI: Karik bele esplika relasaun serbisu entre Polísia Nasionál Serbisu Investigasaun Kriminál (PNSIK) no Polícia Científica de Investigação Criminal (PCIC), tanba dala barak mosu hanoin mai hosi públiku katak serbisu PNSIK no PCIC hanesan dupla funsaun no dalaruma membru rua halo serbisu iha terrenu hanesan “hafuhu” malu fali. Ita-boot nia komentáriu?
Komjer Faustino da Costa: PNSIK ninia ezisténsia to’o ohin loron ha’u bele dehan ami iha Komandu PNTL laiha konflitu ho PCIC, maibé PNSIK no PCIC koopera malu hodi serbí Estadu. Tanba, PNSIK no PCIC no ami sira ne’e hotu ajudante fó apoiu ba serbisu Ministériu Públiku. Tanba na’in loloos ba prosesu kazu hotu-hotu ne’e Ministériu Públiku. Agora, depende ba Ministériu Públiku. Karik mosu kazu ruma, prokuradór sira hakarak delega ba iha ne’ebé? Ne’e depende ba prokuradór sira, tanba ami laiha problema no ami la aproveita atu hadau malu fali kompeténsia serbisu. Ne’e lae. Tanba ida-idak ninia natureza serbisu haktuir kedas iha lei orgánika ida-idak nian hodi halo ninia funsaun tuir lei.
Jornalista: Eugénio Pereira
Editór: Xisto Freitas
