Governu Aseita Pedidu Kompañia Aérea Xina Investe iha TL

DILI, 10 juñu 2019 (TATOLI)-VIII Governu Konstitusionál ne’ebé lidera hosi Primeiru-Ministru, Taur Matan Ruak, aseita ona pedidu kompañia aérea Xina ne’ebé hakarak investe hodi lori aviaun foun tama Timor-Leste hodi loke vou ba Xina, Hongkong, Perth, Bali no Singapura iha futuru.
Governu Timor-Leste mós estabelese ona akordu balun ho governu Malázia atu investe iha aérea aviasaun iha Timor-Leste.
“Ha’u autoriza hanesan ha’u dehan relasaun ho nasaun seluk ajenda ne’e tenke han malu mais governu apoiu inisiativa ida ne’e,” afirma Primeiru-Ministru, Taur Matan Ruak, ohin, ba Jornalista sira iha Palásiu Prezidensiál, Bairru-Pité, Dili.
Atu formaliza akordu ne’e, Xefe Governu fó ona orientasaun ba ministru transporte no komunikasaun hodi trata asuntu ne’e molok estabelese akordu ho kompañia Xina.
“Ha’u fó ona orientasaun ba ministru MTK, para prepara kondisaun hodi haree asuntu ne’e, tanba naturalmente ita liga ho nasaun ida. Ha’u espera katak iha tempu badak ita sei ultra pasa ida ne’e,” hatete Taur Matan Ruak.
Kompañia aérea Xina oras ne’e mós estabelese ona akordu ho Air Timor atu halo operasaun iha Timor-Leste.
Jornalista : Agapito dos Santos
Editór : Francisco Simões

