DILI, 10 juñu 2019 (TATOLI)—Komandante Interinu Polísia Munisípiu Dili, Superintendente Asistente Polísia, Euclides Belo dehan parte polísia hein hela ekipa Ministériu Saúde (MS) prodúz billete infrasaun kona-ba regra bandu fuma sigarru mak polísia foin halo operasaun.
Antes ne’e, iha 29 maiu 2019, Ministériu Saúde liuhosi Departamentu ‘Moras La Hada’et’ serbisu hamutuk ho Organizasaun Mundiál Saúde iha Timor-Leste (OMS-TL), Polísia Nasionál Timor-Leste (PNTL), Aliansa Nasionál Kontrolo Tabaku Timor-Leste (ANCTL-TL-sigla portugés), Diresaun Nasionál Transporte Terrestre (DNTT), fahe adezivu (sticker) proibidu fuma iha fatin públiku ba motorista transporte públiku iha terminál Sentru Kovensaun Dili, Comoro no Becora.
“Agora ami hein hela tabela (billete infrasaun) regra fuma sigarru ne’e Ministériu Saúde hasai ona maka depois PNTL uza hodi halo kontrolu. Sé mak kontra sei simu billete ne’e ba selu iha banku,” dehan Komandante Euclides Belo ba jornalista sira iha Komandu Munisípiu Dili, ohin.
Dekretu Lei Nú. 14/2016 Rejime Kontrolu Tabaku ninian bandu ema fuma iha fatin públiku, no karreta laran. Lei ne’ebé válidu no rigorozu ona, sei kontrola sé mak la kumpri lei ida ne’e PNTL sei haree no foti medida. Kuandu fuma iha fatin públiku sira bele hetan multa $50.00, hanesan mós kontra regra tránzitu.
Euclides apela ba kondutór karreta, bis, mikrolete, angguna no taxi inklui kondutór karreta Estadu nian tomak labele koko fuma sigarru iha karreta laran.
“Aviza no sosializasaun halo ona. Sé mak kontra, nia sei simu billete ne’e ba selu taxa,” nia apela.
Antes ne’e, Xefe Departamentu ‘Moras La Hada’et’, Frederico Bosco A. dos Santos dehan, bainhira fuma iha fatin públiku liliu iha transporte laran bele prejudika fali ema hirak ne’ebé la fuma. Perigu ba sira-nia saúde.
Jornalista: Eugénio Pereira
Editór: Xisto Freitas
