DILI, 11 juñu 2019 (TATOLI)-Jerente Loja ba Agrikultór, Maria Natalice, informa, Ministériu Agrikultura no Peska (MAP) tau ona iha planu atu iha tinan oin loke ka alarga tan sukursál Loja ba Agrikultór iha munisípiu haat.
“Ida iha Oekusi, ida iha área Kosta Súl (Manufahi) atu apoia ba projetu Tasi-Mane nian, no ida tan atu loke iha Baukau no ida iha Maliana,” Natalice afirma, ohin, iha loja refere iha CBD 2 Timor Plaza.
Atu loke tan loja ne’e sei servisu hamutuk ho Ministériu Agrikultura no Peska iha munisípiu sira ne’ebé temi no grupu agrikultór sira iha fatin refere.
Maria Natalice salienta, Loja ba Agrikultór ne’ebé sei loke nia sukursál iha munisípiu haat ne’e sei harii ho modelu ida hanesan iha Dili.
“Buat ida importante ami loke nia sukursál iha fatin seluk ne’e para estoke sira, ezemplu modo sira ne’ebé liu iha ne’ebá bele distribui entre sukursál sira ne’e”.
Sobre projetu Kosta Súl nian, Natalice dehan, MAP hanoin hela bainhira atividade ne’e hahú, konsumidór sei barak, nune’e komesa enkoraja ona agrikultór hodi prodús barak ona atu nesesita ba nesesidade ema sira ne’ebé serbisu iha fatin ne’e sei presiza.
Natalice akresenta, loja sira ne’e deside loke iha kada rejiaun ida-idak uluk, depois bá oin sei haluan ba munisípiu seluk.
Iha tinan oin, ne’e sei hahú uluk husi Oekusi tanba iha ona pedidu husi ne’ebá depois bá fali munisípiu tolu seluk.
Loja ba Agrikultór dahuluk estabelese ona iha 6 juñu 2019 iha CBD 2 iha Timor Plaza ne’ebé mak fa’an produtu lokál porsentu 100.
Jornalista : Maria Auxiliadora
Editór : Francisco Simões
