Kona-ba Pistola Ilegál, Majór Jenerál Lere Husu Públiku Labele Pániku

DILI, 12 juñu 2019 (TATOLI)-Xefe Estado Maiór Jenerál FALINTIL-Forsa Defeza Timor Leste (F-FDTL sigla portugés), Majór Jenerál, Lere Anan Timur, apela ba públiku, atu labele pániku ho informasaun kona-ba pistola ilegál tama ona iha rai laran.
Informasaun kona-ba pistola ilegál ne’e fó sai hosi eis Primeiru-Ministru, Xanana Gusmão ba Jornalista sira iha Domingo semana kotuk, hodi husu ba Polísia Nasionál Sientífika Investigasaun Kriminál (PNSIK) atu buka tuir.
Pistola ilegál ne’ebé deskonfia tama ona iha rai laran, Majór Jenerál Lere dehan, la fó ameasa ba estabilidade nasionál tanba instituisaun Forsa Defeza no Polisia Nasionál Timor-Leste (PNTL sei servisu maka’as hodi asegura estabilidade.
Lere hatutan, maske iha informasaun maibé seidauk iha grupu ruma maka uza pistola hodi tiru ema.
“Nasaun barak, porezemplu iha Angola ne’ebá millaun kilat ilegál la ameasa Angola, maibé iha Timor pistola ida rua atu ameasa ne’e ita timor labale ona,” hateten Majór Jenerál, Lere Anan Timur, ba Jornalista, ohin, iha Palásiu Prezidensiál, Dili.
Atu asegura situasaun seguransa iha rai laran hodi deteta ekipamentu ilegál hirak ne’e, Lere husu governu kria kondisaun no ekipamentu hodi fó apoiu ba Polísia no Forsa sira atu hala’o servisu.
Jornalista : Agapito dos Santos
Editór : Francisco Simões

