DILI, 12 juñu 2019 (TATOLI) – Governu liu-hosi desizaun Konsellu-Ministru (KM) aprova Proposta Dekretu-Lei nú.20/2010, 1 dezembru, ne’ebé mak aprezenta husi Primeiru-Ministru (PM), Taur Matan Ruak kona-ba Rejime Suplementu Remuneratóriu husi Administrasaun Públika (AP).
Ministru Estadu Prezidénsia Konsellu-Ministru Hermenegildo Augusto Cabral Pereira informa, diploma alterasaun dahuluk ba rejime ne’e, fó fleksibilidade previzaun kada ministériu hodi bele jere orsamentu ba viajen munisípiu.
“Konsellu-Ministru aprova alterasaun dahuluk ba Rejime Remunatóriu Administrasaun Públika nian, tanba iha nesesidade atu fó ajilidade no fleksibilidade ba previzaun perdiem nian ne’ebé funsionáriu sira bele ba munisípiu hodi halo serbisu maibé labele liu loron 15. Liu karik, tenke husu autorizasaun husi Primeiru-Ministru no justifikasaun loloos hodi haree orsamentu iha ka la’e atu kobre,” tenik Ministru Estadu Hermenegildo Augusto Cabral ba jornalista sira iha Palásiu Governu, kuarta ne’e.
Tuir governante ne’e, hanesan asuntu ne’ebé importante tebes tanba agora daudauk Governu liu-hosi Sekretaria Estadu ba Asuntu Kombatente no Libertasaun Nasionál (SEAKLN), halo hela serbisu verifikasaun dadus iha munisípiu hotu inklui Rejiaun Administrativa Espesiál Oé-cusse Ambeno (RAEOA), no presiza iha tempu liu loron 15 hodi bele kobre hotu, em vez de ba-mai.
Entretantu, diploma ne’e mós define pagamentu ba rekursu umanu iha administrasaun públika sira bainhira halo deslokasaun ba territóriu nasionál hodi hala’o serbisu, no iha nesesidade atu prolonga tempu liu loron 15, iha kazu mak presiza husu autorizasaun husi Xefe Kaza Sivíl, Prezidénsia Repúblika, Primeiru-Ministru, Prezidente Tribunál Rekursu no dirijente másimu husi ministériu sira, ajente no traballadór husi respetivu órgaun soberania.
Jornalista : Julia Chatarina
Editór : Rafy Belo
