Ministru Agío Pereira Asume Kna’ar Primeiru-Ministru Interinu

DILI, 13 juñu 2019 (TATOLI)-Iha loron 16 juñu 2019, Primeiru-Ministru, Taur Matan Ruak, sei halo dezlokasaun ba estranjeiru hodi halo tratamentu saúde.
Durante auzénsia Taur Matan Ruak nian, maka kompeténsia nu’udar Primeiru-Ministru delega hela ba Ministru Estadu Prezidensia Konsellu Ministru, Hermenegildo Augusto Cabral Pereira “Agío Pereira”.
Relasiona ho ninia auzénsia ne’e, ohin, Taur Matan Ruak, informa ona ba Prezidente Repúblika, Francisco Guterres Lú Olo, hodi bele iha koordenasaun di’ak hosi Prezidénsia Repúblika ho Primeiru-Ministru Interinu, Agío Pereira.
“Iha enkontru semanál ho prezidente iha buat rua maka ha’u informa katak, ha’u iha problema saúde tanba ne’e iha loron 16 juñu ne’e, ha’u sai ba li’ur, enkuantu Ministru Prezidénsia Konsellu Ministru, Agío Pereira, maka sei lidera governu durante ha’u ninia auzénsia,” informa Primeiru-Ministru, Taur Matan Ruak ba Jornalista sira iha Palásiu Prezidensiál, Bairru-Pité Dili.
Hatan kona-ba moras saida maka nia sofre, Taur Matan Ruak, hatete, seidauk bele fó sai ba públiku hodi hein prosesu tratamentu ne’e la’o.
“Ha’u seidauk hatene tanba médiku sira maka hatene,” hateten Taur Matan Ruak ho oin hamnasa ba jornalista sira.
Iha okaziaun ne’e, lider na’in rua ne’e mós ko’alia kona-ba planu vizita hosi Prezidente Repúblika, Francisco Guterres Lú Olo nian ba munisípiu Covalima iha loron 27 to’o 28 fulan juñu, ne’ebé sei akompaña mós hosi membru Governu balun.
Primeiru-Ministru aseita ho vizita ne’e hodi delega membru governu balun de’it akompaña xefe estadu, tanba data ne’e fiksa ona ba governu kona-ba jornada orsamentu 2020.
Jornalista : Agapito dos Santos
Editór : Francisco Simões

