DILI, 14 juñu 2019 (TATOLI)-Universidade Nasionál Timor Lorosa’e (UNTL) realiza graduasaun ba dala rua nulu resin ida (XXI) iha Sentru Konvensaun Dili (CCD–sigla portugés) ho etapa daruak, dadeer no loro-kraik, ba graduadu hamutuk na’in 578, iha sesta (14/06).
Graduadu sira ne’e kompostu husi feto no mane husi departamentu sira iha UNTL hanesan Departamentu Siénsia no Polítika, Tetun, Komunikasaun Sosiál, Filozofia, Dezenvolvimentu Komunitáriu, Polítika Publika no seluseluk tan.
Ministru Ensinu Superiór, Siénsia no Kultura (MESSK), Longuinhos dos Santos kongratula graduadu sira ne’e tanba konsege ramata estudu iha UNTL nune’e mós sujere ba graduadu sira ne’e atu uza didi’ak sira-nia kapasidade no koñesimentu atu bele kontribui ba dezenvolvimentu Timor-Leste (TL).
“Lori naran MESSK ha’u hakarak hato’o parabéns ba graduadu hotu. Hahú ohin, imi-nia misaun maka tenke tau iha prátika koñesimentu ne’ebé imi iha hodi nune’e bele fó kontribuisaun ba dezenvolvimentu nasaun ne’e ninian nune’e mós liuhusi espíritu motivasaun no emprendedorizmu hodi buka hakle’an liután valór universidade ida ne’e iha sosiedade,” kongratula Ministru Longuinhos dos Santos, liuhusi nia diskursu perante graduadu sira.
MESSK mós hato’o sentidu gratidaun ba estrutura tomak UNTL nian tanba konsidera ho esforsu tomak kontribui ba kualidade universidade nian atu bele sai referénsia ba universidade seluk iha nivel nasionál.
Iha fatin hanesan, Reitór UNTL, Francisco Miguel Martins mós kongratula graduadu na’in 578 ne’e tanba konsidera katak graduadu sira ne’ebé susesu nu’udar fini foun ba dezenvolvimentu nasionál rekursu umanu.
“Ho espíritu sapienta (siénsia) no verdade hodi aprofunda no eleva exelénsia ho reflesaun ida ba graduadu sira hanesan fini di’ak UNTL nian ne’ebé hafuan no hakari ba dezenvolvimentu sustentavel iha área oioin ne’ebé universidade oferese”.
Notísia relevante: http://www.tatoli.tl/2018/12/untl-gradua-tan-finalista-697/
http://www.tatoli.tl/2017/05/loron-5-tan-untl-gradua-tan-estudante-nain-377/
http://www.tatoli.tl/2017/05/graduadu-untl-kompremetidu-serbi-nasaun-ho-responsabilidade/
Jornalista : Nelia Rosario
Editór : Rafy Belo
