Ajenda Tentativa, PM Fila iha Loron 21 ka 27 Juñu
DILI, 16 juñu 2019 (TATOLI)—Primeiru-Ministru (PM), Taur Matan Ruak, ohin, halo viajen ba Singapura hodi halo tratamentu saúde iha Ospitál Santa Elisabeth, tuir rekomendasaun hosi médiku Ospitál Nasionál Guido Valadares (HNGV-sigla portugés).
Tuir ajenda tentativa, Xefe Governu sei fila fali mai Timor-Leste (TL) entre loron 21 juñu ka 27 juñu 2019.
Durante konsulta médiku iha Singapura, Ministru Estadu ba Prezidénsia Konsellu Ministru, Hermenegildo Augusto Cabral Pereira mak sei asumi pasta nu’udar Primeiru-Ministru en-ezersísiu hodi lidera VIII Governu Konstitusionál.
Iha viajen ne’e, Xefe Governu hetan akompañamentu hosi Doutór Mendes Pinto no enfermeiru Abílio Oliveira durante konsulta iha Ospitál Santa Elisabeth Singapura.
Entretantu, liuhosi pájina ofisiál Gabinete Primeiru-Ministru ne’ebé Agência Tatoli asesu iha ohin loraik informa, Xefe Governu nia kondisaun saúde normál hanesan baibain, maibé presiza check-up hodi hatene kondisaun saúde iha Ospitál Singapura tuir rekomendasaun médiku espesialista timoroan nian, tanba HNGV sei mínimu iha termu fasilidade saúde.
Jornalista: Julia Chatarina
Editór: Xisto Freitas
