DILI, 24 juñu 2019 (TATOLI)- Membru Polísia Nasionál Timor-Leste (PNTL) hamutuk na’in 53 husi Munisípiu 13 tuir formasaun kona-ba ofisiais inspetór nian durante fulan sia (9) nia laran.
Objetivu husi formasaun ne’e atu kapasita kualidade rekursu liu-liu iha área ofisiais inspetór, tanba sei halo rejime promosaun ba PNTL, husi parte ne’e bele dezenvolve di’ak liután Instituisaun PNTL hodi garante mós seguransa iha nasaun ne’e.
Ministru Defeza no Ministru Interior Interinu, Filomeno da Paixão de Jesus hatete, kontestu ida ne’e mosu tanba nesesidade atu hasai kursu promosaun ba Ofisiál Inspetór ho finalidade PNTL husi sarjentu sira ho koñesimentu ne’ebé nesesáriu ba dezempeñu ba funsaun husi kategoria Ofisiál Inspetór.
Ministru Defeza no Ministru Interior ne’e haree katak, iha númeru inspetór nian sei insufisiente, tanba sira nia funsaun nu’udar Komandante Pelotaun, Komandante husi Munisípiu no Komandante husi Seksaun iha Komandu Munisipál. Tanba Kursu ida ne’e hetan apoiu kooperasaun téknika Guarda Nasionál Republikana (GNR-sigla portugés) Portugál nian.
“Ha’u hanoin kursu ne’e importante iha sistema formasaun PNTL, kursu tenke adota tuir ho aten-barani, profisionalizmu, ha’u husu ba imi nia konsiénsia tanba iha fulan oin mai iha servisu barak imi atu halo, presiza imi hotu tenke estudu no aplikasaun pesoál ne’e. Tanba ne’e, ha’u hakarak kursu ida ne’e nia remata tenke susesu,” afirma Filomeno Paixão, ohin, iha Akademia PNTL, Comoro, Dili.
Nia dehan, matéria ne’ebé sira aprende durante formasaun nian mak, Direitu Fundamental, Direitu Administrativu, Polisiamentu Komunidade, Lei no seguransa Rodoviária, Planeamentu operasaun Polisiál, Étika no Responsabilidade Profisionál, Dixiplinár.
Iha fatin hanesan Komandante Jerál PNTL, Komisáriu Faustino da Costa haktuir, formasaun ne’e hanesan kursu dahuluk tuir planeamentu operasionál formasaun ne’ebé iha, sei hetan teoria durante fulan sia (9) nia laran kontinua prátika iha terrenu depende komandu jerál mak termina.
“Iha kandidatu na’in 329 mak tuir selesaun, maibé iha 54 mak pasa no iha na’in ida mak hatama pedidu rezignasaun, no rekizitu hatete momoos katak tenke sarjentu, mínimu baxarelatu, sira iha idade labele liu 50,” Komisáriu Faustino da Costa informa.
Komisáriu ne’e hatete, klaru ba oin tenke iha kontinuasaun tanba agora atu foti ba ajente ruma no ofisiál la’ós foti nonook de’it, maibé tenke liuhusi formasaun.
Jornalista : Eugénio Pereira
Editór : Francisco Simões
