DILI, 25 juñu 2019 (TATOLI)—Ministru Defeza no Seguransa, Filomeno da Paixão de Jesus hateten maski iha estatutu militár rasik temi idade másimu ba jenerál no forsa sira mak 62 maibé nu’udar veteranu tenke haree buat barak molok reforma, tanba ne’e Xefe Estadu iha razaun atu extende mandatu Xefe Estadu Maiór-Jenerál F-FDTL, Lere Anan Timur, to’o outubru 2019.
“Agora kontinua to’o tempu ne’ebé konforme iha lei dehan renovadu kada tinan (por um ano), maibé kuandu ko’alia loloos estatutu militár temi, ba jenerál no forsa sira másimu idade to’o tinan 62 tenke reforma ona. Ita iha realidade oin-seluk. Ita veteranu sira tenke haree nia sai atu halo saida. Ha’u sente Prezidente Repúblika (PR) tetu buat sira ne’e molok hola desizaun,” nia tenik ba jornalista sira hafoin hala’o enkontru semanál ho PR Francisco Guterres Lú-Oló iha Palásiu Prezidente Nicolau Lobato, Bairru Pité, Dili, tersa ne’e.
Governante ne’e esplika bainhira nia hola parte iha Konsellu Superiór Defeza no Seguransa (KSDS) hodi Xefe Estadu konsulta hanoin sira kona-ba rekondusaun ka hapara mandatu Lere, ikus mai foti konkluzaun katak PM no PR mak sei foti desizaun ba kestaun ne’e.
“Ami-nia prezensa iha Konsellu Superiór Defeza no Seguransa fó de’it ami-nia opiniaun maibé desizaun nafatin iha Prezidente Repúblika nia liman,” nia akresenta.
Biban ne’e, nia mós haktuir, enkontru ohin ho Xefe Estadu ko’alia kona-ba relatóriu defeza no interiór nune’e mós ba forsa no polísia.
“Kestaun polísia nian, ami ko’alia uituan kona-ba Migrasaun, Autoridade Marítima no asuntu seluk relasiona ho atividade forsa no polísia nian,” Paixão informa.
Entretantu, Majór Jenerál Lere Anan Timur asumi mandatu durante tinan haat hahú hosi 2015 liu-ba no kada tinan rekondúz ka ezonera depende ba proposta hosi Governu no depende mós ba Prezidente Repúblika nia desizaun.
Molok mandatu Xefe Estadu Maiór-Jenerál Lere Anan Timur ramata iha 6 outubru 2018, Prezidente Repúblika konsulta ho KSDS hodi rona hanoin hosi ninian membru sira.
Momentu ne’ebá, Governu aprezenta ona proposta ba Xefe Estadu atu tetu mandatu Xefe Estadu Maiór Jenerál F-FDTL no mós aprezenta Koronél Koliati atu asumi kargu Xefe Estadu Maiór F-FDTL troka Brigadeiru Jenerál Falur Rate Laek, ne’ebé antes ne’e asumi kargu refere.
Xefe Kaza Militár Prezidénsia Repúblika, António Soares da Silva “Maucalo”, esplika membru KSDS laiha kompeténsia atu obriga Prezidente Repúblika desidi rekondúz ka ezonera no aseita ka rejeita mandatu ida maibé fó hanoin de’it ba PR katak tenke iha Xefe Estadu Maiór Jenerál ida no Xefe Estadu Maiór ida para tau matan ba F-FDTL, maibé Xefe Estadu maka iha kompeténsia atu desidi.
“Membru Konsellu Superiór Defeza no Seguransa fó opiniaun katak atu nomea no ezonera ne’e kabe ba Prezidente Repúblika,” Maucalo afirma.
Jornalista: Julia Chatarina
Editór: Xisto Freitas
Lee mós notísia ida ne’e: http://www.tatoli.tl/2019/06/prezidente-republika-dekreta-kontinuidade-mandatu-jeneral-lere/
