CET Sei Estabelese Komisaun Justisa no Pás Nasionál

DILI, 02 jullu 2019 (TATOLI) – Conferéncia Epíscopál Timorense (CET) hasai ona despaxu ho númeru 8/CET/VI/2019 atu kria ekipa instaladora inter diosezana hodi estabelese Komisaun Justisa no Pás Nasionál ne’ebé tuir planu sei realiza iha Dezembru tinan ne’e.
Ekipa instaladora ne’e sei estabelese Komisaun Justisa no Pás Nasionál, iha ámbitu komemorasaun ezisténsia Komisaun Justisa no Pás Dioseze Dili ba XXV.
Objetivu husi estabelesimentu ne’e atu promove justisa iha sosiedade, tanba kestaun justisa hanesan kestaun atuál iha fatin hotu, no nunka hotu, tanba ne’e Igreja Katólika tenke hola papél iha asuntu justisa sosiál.

Portavós ekipa instaladora Padre Júlio Crispin Belo, ba Ajénsia TATOLI, ohin, iha Dili, klarifika katak, tuir loloos promove justisa ne’e papél estadu nian, tanba ida ne’e justisa formál, maibé Igreja Katólika mós bele partisipa iha justisa formál no sentidu, estabelese servisu advokasia ruma ba ema sira ne’ebé kbiit laek no mós bele halo prevensaun ba konflitu liu husi formasaun nu’udár realiza saun justisa.
Padre Júlio Crispin Belo esplika, tuir planu, komisaun justisa no pás nasionál ne’e sei akompaña kriasaun lei sira ne’ebé korresponde duni ho sidadaun nia interese, liuhusi prosesu elaborasaun aprovasaun too ninia implementasaun.
Alende ne’e sei iha mós ninia programa rasik mak hanesan programa kurtu prazu, médiu prazu no longu prazu ne’ebé sei implementa hodi halo armonizasaun ba atividade komisaun ne’e rasik.
Prezidente Komisaun Instaladora maka atuál diretór Komisaun Justisa no Pás Dioseze Dili Padre Hermínio de Fátima Gonçalves ho nia membru hamutuk na’in 16.
Jornalista : Cipriano Colo
Editór : Francisco Simões

