Governu Haforsa Kooperasaun Ho Nasaun Parseiru

DILI, 04 jullu 2019 (TATOLI)–Vise Ministra Finansas nu’udar mós Ministra Finansas ein ezersísiu, Sara Lobo Brites hateten, liuhusi reuniaun Timor- Leste ho Parseiru Dezenvolvimentu (TLDPM-Timor-Leste’s Development Patners Meeting), nu’udar pasu ne’ebé di’ak atu Timor-Leste kontinua haforsa nia kooperasaun ho nasaun parseiru sira.
“Durante ne’e nasaun parseiru sira maka fó apoia ita, liuliu ita nian dezenvolvimentu. Saida mak ohin ita hala’o ne’e ita reuni ho sira para bele haforsa tan ita nia koordenasaun ho sira,” informa Ministra Sara Lobo Brites, ohin, hafoin partisipa enkontru TLDPM ne’ebé hala’o iha salaun Ministériu Finansas, Dili.
Liuhusi enkontru TLDPM rasik atu hato’o ba nasaun parseiru sira katak apoia ne’ebé nasaun sira parseiru apoia mai Timor-Leste bele foka liu ba planu no prioridade governu nian.
“Ita mos fó hatene ba sira katak apoiu ne’ebé sira fó karik bele foku liu ba planu no prioridade ne’ebé governu hakarak implementa,” Ministra Sara Lobo Brites informa.
Ministra Sara Lobo akresenta, parseiru sira ne’ebé daudaun ne’e fó apoiu ba dezenvolvimentu iha setor barak, hanesan n apoiu umanitária, bee moos, asisténsia téknika. Alende ne’e mós iha agrikultura, saúde edukasaun, justisa, obras publika, transporte no fó apoiu ba ministériu finansas.
“Uitoan ka barak, kuaze sira apoiu iha área hotu-hotu, inklui Ministériu Finansas kobre área jestaun finansas publika,” tenik Ministra Sara Lobo Brites.
Jornalista : Natalino Costa
Editór : Francisco Simões

