CCF Presta Omenájen Ikus ba Saudozu Samba-Sembilan

DILI, 6 jullu 2019 (TATOLI)—Komité Sentrál FRETILIN (CCF-sigla portugés), presta omenájen ikus ba saudozu Jaime Ribeiro ‘Samba-Sembilan’ iha sede CCF, Fatuhada, Comoro, ohin.
Iha omenájen ikus ne’e, marka prezensa hosi espoza Prezidente Repúblika, Cidália Nobre Guterres ho estrutu CCF tomak.

Bainhira saudozu Samba-Sembilan to’o iha sede CCF, akompaña ho knananuk Foho Ramelau. Sekretáriu Jerál FRETILIN, Marí Alkatiri labele partisipa iha presta omenájen ne’e, tanba dezloka ba Oé-Cusse.
Adjuntu Sekretáriu Jerál Partidu FRETILIN, José Reis, fó agradese ba família boot Samba-Sembilan nian. “Lori lideransa no CCF nia naran hato’o sentida kondolénsia ba família elutada,” Adjuntu Sekretáriu Jerál ne’e ko’alia iha nia deskursu.
José Reis informa katak ohin liuhosi sede CCF atu halo última omenájen ba saudozu Samba atu bele dignifika ninia kontribuisaun ba luta libertasaun nasionál, ne’ebé mak hahú organiza luta ne’e hosi FRETILIN.
Nia afirma, dignifikasaun ne’ebé mak fó ba iha saudozu Samba la to’o de’it iha omenájen iha CCF, maibé importante liu-ba hotu-hotu atu bele simu lia-menon ida ne’ebé família foin hato’o ba iha ita tomak.
“Lia ida ne’ebé todan ba lideransa polítika no ba ita hotu-hotu, liliu ba maluk veteranu sira ne’ebé maka sei haree, sei akompaña situasaun ida ne’e,” tenik Reis.

Nia afirma, atu fó dignidade ba veteranu ne’ebé mate ona, saudozu Samba nia isin lolon hatuur iha Komité Sentrál FRETILIN, família foin hato’o ezijénsia boot ida ba FRETILIN oinsá atu la’o ba oin fó dignidade ba sira ne’ebé mak terus durante okupasaun ilegál Indonézia nian.
Iha fatin hanesan, reprezentante família saudozu, Hermenegildo da Cruz, lori oan ki’ak no feto faluk, fó agradese wa’in ba disponibilidade tomak hosi CCF no mós vizita Sekretáriu Jerál FRETILIN, Marí Alkatiri iha rezidénsia matebian iha Ulmera.
“Ohin lori maun Samba-Sembilan mai iha CCF hodi hetan omenájen ikus liu. Nia (Samba) hameno hela ba ita tomak no ba ukun na’in sira atu labele se kotuk ba malu, labele vinga malu, maibé hamutuk hodi defende estadu ne’e liu sasán hotu-hotu,” reprezentante família ne’e fó hanoin.
Jornalista: Evaristo Soares Martins
Editór: Xisto Freitas

