DILI, 5 jullu 2019 (TATOLI)—Sentru Saúde Comoro liuhusi Saúde Materna Infantil halo atendimentu ba inan isin-rua loron ida mínimu ema na’in 50.
“Inan isin-rua ne’ebé halo atendimentu iha Sentru Saúde Comoro loron ida ema na’in 50. Dadeer simu ema na’in 30 no lorokraik simu ema na’in 20,” dehan responsável Programa Sentru Saúde Materna Infantil Comoro, Olinda Soares, ba jornalista Agência Tatoli iha nia kna’ar fatin, sesta (5/7).
Nia haktuir, inan isin-rua sira ne’ebé mai ho keixa, sira atende liu ida ne’e (liu númeru 50 iha leten) no bainhira sira observa ruma iha ne’e mak iha komplikasaun ruma, entaun sira transfere ba Hospital Nacional Guido Valadares (HNGV).
Responsável ba maternidade ne’e dehan, sira mós simu inan isin-rua hamutuk 633 liuhusi konsulta jerál durante juñu nia laran.
“Ami-nia kama ba partu nian iha tolu (3) no mós kama ida seluk atu observa inan isin-rua sira ne’ebé seidauk partu ne’e iha kama hitu (7). Tanba pasiente barak entaun ami tau tan rezerva iha li’ur. Kama hirak ne’e mesak kondisaun di’ak hotu,” tenik Olinda.
Iha fatin hanesan, Médika Jerál, Milena do Rego informa katak moras ne’ebé ho numéru aas iha Sentru Saúde Comoro mak moras infesaun vias respiratória (ISPA), moras kulit, diareia, hipertensaun, pneumonia, malnutrisaun no tuberkoluze (TBC).
Aleinde ne’e, jornalista Tatoli tenta atu halo konfirmasaun ba xefi Sentru Saúde Comoro hodi hatene kle’an liu-tan kona-ba difikuldade saida mak Sentru Saúde Comoro ne’e hasoru, maibe xefi Sentru Saúde rasik lakohi fó komentáriu ba asuntu ida ne’e.
Jornalista: Felicidade Ximenes
Editór: Xisto Freitas
