DILI, 5 jullu 2019 (TATOLI)—Prosesu aprendizajen iha Eskola Sekundária 4 de Setembro UNAMET Balide, Dili, la’o ho di’ak bazeia ba oráriu kada profesór.
“Prosesu aprendizajen iha eskola ne’e la’o hanesan babain bazeia ba oráriu kada profesór. Oras estudante no profesór sira tama, iha dadeer tama tuku 8-12 otl no lorokraik tama 13-17 otl,” Diretór Interinu Eskola Sekundária Públika 4 de Setembro, Sérgio Alfredo da Cruz, ba Agência Tatoli iha nia kna’ar fatin, Balide, sesta (5/7).
Nia esplika, eskola ne’e rasik nia prosesu aprendizajen fahe ba parte rua. Iha dadeer, ba estudante sira ne’ebé monu ba matéria siénsia sosiál no parte lorokraik ba estudante sira ne’ebé monu ba matéria siénsia naturál.
“Estudante sira kada turma iha ema na’in 50-60 resin. Rekursu umanu ne’ebé hanorin iha ne’ebá ho abilidade lisensiatura, mestradu, baxarelatu. Totál profesór hamutuk 117 ne’ebé mai hosi profesór permanente, kontratadu no profesór tempu parsiál (part time). Iha eskola ne’e rasik ho fasilidade ne’ebé sufisiente ba alunu sira maibé ba profesór sira sei menus. Problema ne’e, ami hato’o ona ba Ministériu Edukasaun, maibé sei iha prosesu nia laran atu rezolve,” Sérgio haktuir.
Aleinde ne’e, nia hatutan, eskola ne’e rasik mós hala’o atividade extra. “Fila fali ba profesór ida-idak. Karik tarde atu finaliza matéria iha unidade matemátika ka matéria seluk, profesór aviza ba estudante sira atu tuir atividade extra iha loron sábadu,” Sérgio informa.
Nia reforsa, iha eskola ne’e rasik iha teoria no mós prátika ba estudante sira. “Profesór sira ne’ebé hanorin kona-ba desportu nian, aleinde fó teoria, fó mós prátika hanesan desportu, katak konvida estudante sira halo jogu amizade entre sira ho sira hodi komemora loron espesiál, loron aniversáriu ba eskola ne’e rasik,” nia subliña.
Entretantu, atividade extra ne’ebé eskola refere hala’o ona hanesan tuir kompetisaun iha li’ur hanesan Canossa Cup, kadi kakutak (sertame), kanta, dansa kultura. Atividade extra ne’ebé iha halo estudante sira entusiáz hodi partisipa iha atividade ne’e.
Jornalista: Nelia Fernandes
Editór: Xisto Freitas
