DILI, 10 jullu 2019 (TATOLI)-Xefe Estadu Majór Jenerál Falintil-Forsa Defeza Timor-Leste (F-FDTL), Majór Jenerál Lere Anan Timur nafatin husu ba lider nasionál sira atu hamutuk buka konsensu ba interese nasionál.
“Ita-nia lider nasionál ne’ebé sei moris, jerasaun foun tenke laran metin ba sira. No husu ba lider nasionál atu hamutuk konsensu ba interese nasionál ninian. Labele idaidak la’o no deside ninia hanoin, ida ne’e mós bele fo inpaktu negativu ba futuru,”hateten Xefe Estadu Majór Jenerál Lere Anan Timur perante Jornalista iha Palásiu Prezidensiál, Bairu Pite, kuarta (10/07/2019).
Tuir Lere, ohin loron ita haree ba polítika, demokrasia; maioria no minoria. “Maibé, kuandu ita ko’alia kona-ba maioria ita la hanoin konsekuénsia futuru nian saida mak ita halo iha pasadu, no agora ba futuru”.
Tanba ne’e, nia dehan, polítiku ne’e tenke hanoin buat hirak ne’e hotu. Nia reforsa, hanesan mós lider nasionál ida, ho situasaun ne’ebé agora enfrenta, sei iha mudansa.
“Mudansa ne’e mak dezafia ita-nia kapasidade, lider ida-idak nian, situasaun evolui, mudansa iha, maibé ita ema nafatin,” konsidera Xefe Estadu Majór Jenerál Lere Anan Timur.
Notísia relevante: http://www.tatoli.tl/2019/07/lere-apela-timoroan-hotu-hametin-paz-no-estabilidade/
Jornalista : Nelson de Sousa
Editór : Rafy Belo
