DILI, 9 jullu 2019 (TATOLI)—Reitór Universidade de Dili (UNDIL), Jose Belo Pereira, orgullu ho polítika governu kona-ba ensiñu superiór públiku no privada, maibé presiza diskute no fórmula didi’ak.
“Durante ne’e iha prosesu akreditasaun ida de’it. Ne’ebé, agora ne’e ita hakarak kurríkulu tenke hanesan, entaun ita tenke disiplina lai departamentu sira ne’ebé ita iha. Loloos, ministériu haree dehan katak poténsia sira ne’ebé UNTL iha, ida ne’ebé UNPAZ iha, ida ne’ebé UNDIL iha, ita fórmula haree iha ne’ebé di’ak liu (the best) ne’e ita entrega ba universidade balun nune’e labele hadau malu. Ita hakarak kualidade ne’ebé di’ak. Kualidade di’ak fasilidade tenke di’ak, profesór tenke di’ak no estudante,” nia dehan ba Agência TATOLI, tersa (9/7), relasiona ho polítika governu atu halo revizaun ba kurríkulu, nune’e ba futuru ensiñu superiór públiku no privada uza kurríkulu ida de’it.
Tuir nia katak governu presiza loke diskusaun ba programa ne’e, nune’e iha implementasaun labele falla. “Se ita haree medisina iha UNTL, hotu-hotu reforsa medisina ne’e sai di’ak liu. Se UNDIL iha ona dentária, ita reforsa ida ne’e. Ita lalika iha kompetisaun atu loke tan. Estadu apoia tan bele la’o di’ak ona,” nia esplika.
Nia hateten katak atu hasa’e kualidade iha ensiñu superiór, buat hotu-hotu tenke sufisiente hanesan dosente, laboratóriu, kurríkulu ho sistema.
“Ha’u hanoin polítika governu nian importante, maibé presiza fórmula fali kurríkulu ne’e hodi bele diskute iha fórum reitoria, nune’e ita hakarak kualidade ne’e hanesan ho nasaun seluk. Revizaun ne’e governu nian bele %75, universidade sira-nian hanoin %25 % nune’e bele halo diferensa direitu UNDIL no UNPAZ iha. Pur-ezemplu, ami iha ne’e simulasaun ba julgamentu ne’e bazeia ba rezultadu akreditasaun fó sai, maibé buat balun universidade seluk iha ami laiha. Tanba ne’e, ita tenke halo para diferensa ne’e tenke iha, entaun kurríkulu ne’e merese halo revizaun duni,” José subliña.
Atu halo revizaun, nia tenik, tenke bazeia ba kontestu Timor nian, la’ós polítika de’it, orsamentu mós tenke iha, vizaun tenke estratéjiku tantu públiku ka privadu prepara nia ema atu kontribui ba rai ida ne’e.
Jornalista: Evaristo Soares Martins
Editór: Xisto Freitas
Lee mós notísia ida ne’e: http://www.tatoli.tl/2019/06/ensinu-superior-publiku-ho-privada-sei-implementa-kurrikulu-ida-deit/
